Futbolçu kimi ''Liverpul'' və ''Qalatasaray''dakı çıxışı ilə tanınan Albert Rieranın məşqçilik karyerasının əvvəli çox maraqlı keçir.

"Football-plus.az" xəbər verir ki, ispaniyalı mütəxəssis 2 il ''Qalatasaray''da Fatih Terimin köməkçisi kimi çalışdıqdan sonra ötən yay Sloveniya təmsilçisi ''Olimpiya''nın başına keçmişdi.

41 yaşlı Riera müstəqil məşqçi kimi ilk ilindəcə uğur qazana bildi. ''Olimpiya'' həm sona 5 tur qalmış çempionluğu rəsmiləşdirdi, həm də ölkə kubokunu qazandı. Buna baxmayaraq klub prezidenti Adam Delius ispaniyalı ilə yolları ayırmaq qərarına gəlib! Onların münasibətləri qaydasında deyildi.

Ümumiyətlə ''Olimpiya'' fanatları ilk gündən bu təyinatı dəstəkləmirdilər. Ötən yay fanatlar Rieranın imza mərasimi zamanı məkana daxil olmuş və onu ordan qovmuşdular.

Həmin görüntülər uzun müddət Avropa mətbuatının bəzəyinə çevrilmişdi. Göründüyü kimi 2 titulun qazanılması da klubda məşqçiyə qarşı simpatiyanın yaranmasına yardım etmədi.

Onu da bildirək ki, ''Olimpiya'' Çempionlar Liqasının təsnifat mərhələsində ''Qalatasaray''ın mümkün rəqiblərindən biridi.

ƏLİ