Domenek Torrentin köməkçilərindən olan Albert Riera klubdan ayrıldığını rəsmən açıqlayıb.

Bunu gözləmək olardı. Çünki Torrent köməkçiləri ilə birlikdə istefaya göndərilib. Okan Burukun isə uzun illərdi birlikdə çalışdığı öz köməkçiləri var. Riera ona lazım deyil. Xatırladaq ki, 40 yaşlı ispaniyalı daha öncə 2011-14-cü illərdə futbolçu kimi ''Qalatasaray''ın şərəfini qoruyub. 3 mövsüm ərzində ikisi çempionluq olmaqla 3 titul qazanıb və 80 rəsmi oyuna çıxaraq 4 qol vurub. Bu ilin yanvarında isə 8 illik fasilədən sonra komandaya köməkçi-məşqçi kimi qayıtmışdı.

Sonuncu xəbər Arda Turanla bağlıdı. ''Qalatasaray''la müqavilə müddəti başa çatan və sərbəst statusda olan məşhur futbolçunun gələcək taleyi qeyri-müəyyəndi. 35 yaşlı yarımmüdafiəçi ''TV 100'' kanalına verdiyi son müsahibədə diqqətçəkən ifadələr işlədib. O artıq ''Qalatasaray''da və superliqanın başqa bir klubunda oynamayacağını bildirərək karyerasını Dubay, Qətər və ya ABŞ-da davam etdirəcəyini istisna etməyib. Amma Turan daha çox məşqçiliyə meyl etdiyini və özünə köməkçilər seçdiyini bildirib. O, ''altyapı''dan işə başlamaq istədiyini əlavə edib.

Bundan başqa Ardanın ''Qalatasaray''dan inciməsi və ''vida oyunu istəmirəm, mənə hədiyyə kimi bir forma verə və ya adi bir tort da kəsə bilərdilər'' sözlərini işlətməsi diqqəti çəkib. Onu da bildirək ki, dünən məhkəmə yenidən Ardanın xeyrinə qərar verib. Bu futbolçu məşhur müğənni Berkay Şahinin həyat yoldaşı Özləm Ada Şahinə cinsi təcavüz etməkdə gunahlandırılırdı. Bu hadisə 2018-in oktyabrında yaşanmış və uzun müddət gündəmi zəbt etmişdi. Əslində ilk məhkəmə prosesində Ardanın günahsız olduğu sübuta yetirilmişdi. Amma Apellyasiya Məhkəməsi bu qərarı ləğv etdiyindən Arda ikinci dəfə hakim qarşısına çıxmalı oldu və bu dəfə də məhkəmə onun xeyrinə qərar verdi.

ƏLİ