Mövsümü istədiyi kimi keçirə bilməyən, kubokun finalında məğlub olan və avrokuboklara vəsiqə qazana bilməyən ''Trabzonspor''a daha bir zərbə sabiq futbolçusu Toma Menyedən gəlib. Təcrübəli belçikalı futbolçu qaradənizlilərdən FİFA-ya şikayət edib.

Qeyd edək ki, daha öncə ''Brügge'', PSJ, Dortmund ''Borussiya''sında forma geymiş 33 yaşlı müdafiəçi ötən mövsümün qış fasiləsində Trabzona gəlmişdi. Həmin vaxt ''Trabzonspor'' yarım mövsüm üçün Menyeyə 850 min avro maaş, eləcə də 500 min avro imza parası söz vermişdi.

İndi futbolçu məhz bu pulları hələ də tam olaraq ala bilmədiyini iddia edərək FİFA-ya şikayət edib. Ötən ilin avqustunda Menye müqavilədəki maddədən yararlanaraq ''Lill''ə yollanmağa üstünlük verdi. Belə ki, onun istədiyi kluba getmək fürsəti var idi. Amma həmin vaxt ''Trabzonspor'' da öz növbəsində bu futbolçudan FİFA-ya şikayət etmişdi.

''Bordo-mavililər'' qeyd etmişdi ki, futbolçu yollanmaq istədiyi klubun və ölkənin adını əvvəlcədən onlara deməli idi. Amma ''Trabzonspor''un bu şikayəti öz bəhrəsini vermədi.

Menye cari mövsümü ''Lill''də başa vurdu. İndi isə onun özünün şikayətinə FİFA tərəfindən baxılacaq.