''Brügge''nin son anda Vedat Muriqidən imtina etməsi bu kluba baha başa gələ bilər.

Football-plus.az ''Latsio'' Belçika çempionundan FİFA-ya şikayət etməyə hazırlaşır.

Qeyd edək ki, müqavilə ilə ''Latsio''ya məxsus olan kosovolu forvard ''Brügge'' ilə anlaşmış və hətta Belçikaya yollanaraq tibbi müayinədən keçmişdi. ''Brügge''nin təcrübəli hücumçuya görə təxminən 11 milyon avro ödəyərək klub rekordunu qıracağı gözlənilirdi. Amma tibbi müayinənin ardından şok olay yaşandı. ''Brügge'' rəsmiləri Muriqinin tibbi müayinədən keçə bilmədiyini iddia edərək bu transferdən vaz keçdilər. ''Latsio'' məsələni araşdırdıqdan və müayinənin cavablarını öz tibbi personalına yoxlatdırdıqdan sonra məlum oldu ki, orda heç bir ciddi problem yoxdu. ''Brügge'' sadəcə son anda bu futbolçudan vaz keçdiyinə görə bu məsələni bir bəhanə kimi ortaya atıb. ''Latsio''nun qarşıdakı günlərdə FİFA-ya şikayət edəcəyi gözlənilir.

Xatırladaq ki, Muriqi Roma klubuna 2020-nin yayında ''Fənərbaxça''dan transfer olunub. ''Latsio''da ilyarım ərzində heç cür ümidləri doğrultmayan 28 yaşlı forvard ötən mövsümün ikinci dövrəsində icarə əsasında şərəfini qoruduğu ''Malyorka''da 17 oyunda 5 qol, 3 məhsuldar ötürməlik performans sərgiləmişdi.