''Fənərbaxça''ya qol vuran futbolçu: ''Qalatasaray''a da sürprizimiz olacaq
Məlum olduğu kimi Türkiyə çempionatının son turunda ''Kayserispor'' səfərdə sürpriz şəkildə ''Fənərbaxça''nı büdrədərək (3:3) çempionluq mübarizəsi aparan rəqibinə ciddi zərbə vurdu.
Həmin oyunda kayserililərin heyətində ilk qolu vuran Ramazan Civelek ilə hər 3 qolda yaxından iştirak edən Gökhan Sazdağı öz oyunu ilə diqqət çəkməyi bacardı. Maraqlıdı ki, onların hər ikisi ''Fənərbaxça''nın yetirməsidi. Ramazan peşəkar karyerasına məhz İstanbul nəhəngində start verib.
Daha sonra ''Qaziantep'' ''Sakaryaspor'' və ''Fatih Karagümrük''də top qovan 29 yaşlı vinger 2020-ci ildən ''Kayserispor''dadı. Bu mövsüm 24 rəsmi oyunda 2 qol, 2 məhsuldar ötürmə ilə fərqlənən Ramazan bir neçə həftə sonra ''Qalatasaray''a qarşı da layiqli mübarizə aparacaqlarını bildirib:
''Fənər''lə oyundan sonra qarışıq duyğular yaşadım. Bir tərəfdən sevincli idim. Amma tam sevinə bilmirdim. Çünki ''altyapı'' da daxil olmaqla ''Fənər''də 13-14 il keçirmişəm. Türkiyənin ən böyük klublarından birinə qol vurdum. ''Fənərbaxça''nın çörəyini yemişəm və o klub sayəsində peşəkar olmuşam. Amma şərəfini qoruduğun kluba xəyanət etməməyi məhz orda öyrənmişəm. Bu üzdən mən də, Gökhan Sazdağı da meydanda aslanlar kimi mübarizə apardıq. ''Qalatasaray''a da sürprizimiz olacaq. Dörd həftə sonra onlara qarşı da səfərdə oyunumuz var. Həmin matçda da aslanlar kimi mübarizə aparacağıq. Mövsümün sonuna qədər hər xal uğrunda döyüşəcəyik''.
Ramazanın sözləri ''Samsunspor'' başqanı Yüksəl Yıldırımın ''Fənərbaxça'' ilə oyundan sonra verdiyi açıqlamaları bənzəyir. Samsun təmsilçisi 28-ci turda səfərdə ''Fənərbaxça''nı büdrətdikdən (0:0) sonra Yıldırım ''Qalatasaray''dan da xal alacaqlarına söz vermişdi. Amma 31-ci turda sürpriz qeydə alınmamış və ''Qalatasaray'' Samsunda 2:0 hesablı inamlı qələbə qazanmışdı.
Digər xəbərlər
