Türkiyə çempionatının 37-ci turunda ''Qalatasaray'' ''Göztəpə''nin qonağı oldu.

''Football-plus.az'' xəbər verir ki, İstanbul nəhəngi artıq çempionluğu rəsmiləşdirməsinə, bu matça motivasiyasız çıxmasına və bəzi əsas futbolçularsız oynamasına baxmayaraq yenə də qalib gəlməyi bacardı. Halbuki bu mövsüm ''Göztəpə''yə qarşı səfərdə həm ''Fənərbaxça'', həm də ''Beşiktaş'' qələbəyə həsrət qalmışdı. Özü də onlar İzmiri əsas heyətlə fəth edə bilməmişdilər.

Cəzalı Musleranı əvəzləyən Günay Güvənç önəmli seyvlərlə yadda qaldı. Qollar fasilədən sonra vuruldu. Qələbənin əsasını 70-ci dəqiqədə Kaan Ayhan qoydu. Təcrübəli müdafiəçi cərimə zərbəsi zamanı topun başına keçərək mükəmməl zərbə ilə uzaq ''doqquzluğ''u dəqiq nişan aldı. ''Qalatasaray''da cərimə zərbəsindən qol vuran son futbolçu 2024-cü ilin yanvarında ''İstanbulspor''la oyunda Kərəm Aktürkoğlu olmuşdu. Son anlarda isə səhnəyə Morata çıxdı.

Beləliklə, Okan Burukun komandası bu mövsüm superliqada ilk dəfə 7 oyunluq qələbə seriyası yaxalamış oldu. Eləcə də ''Qalatasaray''ın ''Göztəpə''yə qarşı çempionat çərçivəsində qələbə seriyası 7 oyuna yüksəldi. Xalını 92-yə yüksəldən ''sarı-qırmızılar'' yeni və daha öncə görünməyən göstəricilər yaxalamaqda davam edirlər. ''Cim-Bom'' Türkiyə çempionatı tarixində ardıcıl iki mövsüm ən azı 90 xal toplayan ilk kollektiv oldu! Ötən mövsümü komanda 102 xalla tamamlamışdı.

Daha bir diqqətçəkən məqam odu ki, 2023/24-ə qədər ''Qalatasaray'' heç vaxt bir mövsümdə səfərdə 15 qələbə qazana bilməmişdi. Amma komanda son iki mövsümün hər birini səfərdə 15 qələbə qazanmaqla tamamlamış oldu!