Türkiyə çempionatının 29-cu turunda prinsipial İstanbul derbisi baş tutdu.

''Football-plus.az'' xəbər verir ki, ''Qalatasaray'' ''Beşiktaş''la səfərdə oynamasına baxmayaraq favorit sayılırdı. Uğursuz və qeyri-sabit mövsüm keçirən ''Qartal''ın rəqibin seriyalarına son qoyacağına az adam inanardı.

Oyun ''Cim-Bom'' üçün yaxşı başlamadı. 23-cü dəqiqədə az qala meydanın mərkəzində topu qəbul etdikdən sonra təxminən 65 metr irəliləyən və Sançesi ''bazara göndərən'' Rafa Silva yaxın küncü dəqiq nişan aldı. Bu azmış kimi 33-cü dəqiqədə qonaqlar azlıqda qaldılar. Frankovskinin Muçiyə qarşı hərəkətini hakim əvvəlcə sarı vərəqə ilə qiymətləndirdi. Amma VAR işə qarışdıqdan sonra epizod son ümid folu kimi qiymətləndirildi və sarı vərəqə qırmızı vərəqə ilə əvəz olundu.

Hücum qurmaqda və qol epizodu yaratmaqda çətinlik çəkən ''sarı-qırmızılar''ın dadına Lukas Torreyra çatdı. Uruqvaylı futbolçu fasilə ərəfəsində uzaq məsafədən vurduğu mükəmməl zərbə ilə hesabı bərabərləşdirdi. ''Qalatasaray'' ikinci hissəyə bir qədər fəal başlasa da, dəqiqələr irəlilədikcə müdafiəyə çəkilməyə başladı. Komanda 10 nəfərlə həm də hücuma çıxmağa çalışdığından müdafiədə boşluqlar yaranırdı. Sürpriz baş vermədi. Daha yaxşı oynayan tərəf olan ''Beşiktaş'' 66-cı dəqiqədə Jedson Fernandeş ilə yenidən önə keçdi. Bu qol həm də yekun nəticəni müəyyənləşdirdi.

Beləliklə, ''Qalatasaray''ın superliqada 28 oyunluq məğlubiyyətsiz seriyası qırıldı (23 qələbə, 5 heç-heçə) və bununla da çempionatda uduzmayan komanda qalmadı. Okan Burukun kollektivi sonuncu dəfə ötən mövsümün 37-ci turunda evdə ''Fənərbaxça''ya uduzmuşdu. Eləcə də İstanbul nəhənginin superliqada səfərdə 25 oyunluq məğlubiyyətsiz seriyası da qırıldı (21 qələbə, 4 heç-heçə) və bu göstərici turnirin yeni rekordu kimi tarixə düşdü. Səfərdə son məğlubiyyət 2023/24-ün 12-ci turunda ''Hatayspor''la oyunda (1:2) qeydə alınmışdı. Bu nəticə ilə həm də ''Qalatasaray''ın məğlubiyyətsiz çempion olmaq arzusu məhv oldu. Onların bu arzusunu məhz ''Beşiktaş''ın məhv etməsi maraq doğurur. Çünki Türkiyə futbolunda yeganə məğlubiyyətsiz çempion ''Beşiktaş''dı. Komanda bunu 1991/92 mövsümündə Qordon Milnin başçılığı altında bacarıb. Düzdü, həmin mövsüm komandaların sayı 16 idi və ''ağ-qaralar'' mövsüm ərzində 30 oyun keçirərək çempion olmuşdular (23 qələbə, 7 heç-heçə).

Əslində ''Qalatasaray''ın tarixdə əvvəldən sona qədər uduzmadığı bir mövsüm olub. Söhbət 1985/86-dan gedir. Amma qəribədi ki, komanda həmin mövsüm çempion ola bilməmişdi. Sonda xallar bərabər olmuş və ''Beşiktaş'' mövsüm ərzində 2 dəfə uduzmasına baxmayaraq daha yaxşı top fərqinə malik olduğu üçün çempion olmuşdu.