Kilian Mbappenin “torba-torba” qollarına baxmayaraq, mövsümü titulsuz başa vuran “Real” indidən gələn mövsüm üçün “qollarını çırmalayıb”.

Xabi Alonsonun baş məşqçi postuna gəlişi hələ rəsmən gerçəkləşməsə də, onun istəyi ilə artıq yeni transferlər həyata keçirilir. Sağ müdafiəçi Trent Aleksander-Arnoldun ardından Madrid nəhəngi indi də “Bornmut”un və İspaniya yığmasının mərkəz müdafiəçisi Din Höyseni heyətinə qatıb. 20 yaşlı futbolçu “kral klubu”na 58 milyon avroya başa gələcək! Bu məbləğ ingilislərə 3 hissəyə bölünərək 2027-ci ilin sonuna qədər ödəniləcək. Höyseni yetişdirən klublardan “Yuventus” 10 faiz, “Malaqa” 5 faiz pay alacaq.

195 sm boya malik Höysen 2005-ci ildə Amsterdamda doğulub. Atası Donni vaxtilə “Ayaks”, “Alkmaar” kimi klublarda top qovub və hazırda oğlunun meneceridi. Höysenin ailəsi 2010-cu ildə İspaniyanın Marbelya şəhərinə köçdüyündən o, İspaniyada böyüyüb. 6 il “Malaqa”nın akademiyasında futbolun sirlərini öyrəndikdən sonra 2021-də, yəni 16 yaşında “Yuventus”un akademiyasına yollanıb. Amma “Yuve”nin əsas komandasında ona yer tapılmayıb. 2023/24-ün ikinci dövrəsini icarə əsasında “Roma”da keçirəndən sonra həmin yay 15,2 milyon avroya “Bornmut”a transfer olunub. Məhz İngiltərənin ortabab klubuna yollanmaqla bu futbolçunun karyerasında yeni dönəm başladı. İngilislərin uzaqgörənliyi də diqqəti çəkir. “Bornmut” cəmi bir ildən sonra bu futbolçunu az qala dördqat baha qiymətə satdı!

Höysen ilk aylarda əsas heyətə düşməkdə çətinlik çəkirdi. Amma dekabrdan etibarən şans qazanmağa və etimadı doğrultmağa başladı. Artıq 2-ci dövrənin gedişində ona “Çelsi”, “Liverpul”, “Arsenal”, “Bavariya” kimi nəhənglər maraq göstərirdi. Yəni istedadlı futbolçunun yayda klubunu dəyişəcəyi bəlli idi. Martda o, yığma səviyyəsində də debüt etdi. Niderlandda doğulmasına və aşağı yaş qruplarında məhz bu ölkənin şərəfini qorumasına baxmayaraq, Höysen İspaniya yığmasında oynamağa üstünlük verdi.

Maraqlıdı ki, onun “buğalar”ın heyətində debütü Millətlər Liqasının 1/4 finalında məhz elə Niderlanda qarşı oyuna təsadüf etdi. “Real” bu futbolçu uğrunda mübarizəyə qoşulandan sonra digər klublar geri çəkilməli oldular. Bir sıra məqamlar üst-üstə düşdü. Din həm ÇL-də, həm də klublararsı dünya çempionatında iştirak etmək istəyirdi. Xabi Alonso da şəxsən rəhbərlikdən həmyerlisinin transferini tələb etdi. Höysenin uşaqlıqdan “Real” azarkeşi olması və ailəsinin İspaniyada yaşaması da sözünü dedi. O, ispan və niderland dillərindən başqa ingilis və italyan dillərində də danışa bilir.

Höysen geridən hücumu başlamaq baxımından artıq indidən top-səviyyədədi. O, hətta təzyiq altında olanda belə topu irəli vurmaq əvəzinə yaxındakı komanda yoldaşına ötürməyə üstünlük verir. Yəni pressinqdən həm ötürmə, həm də topla irəliləmək sayəsində çıxa bilir. Boş zona yaxalayan kimi topla ən azı 40-50 metr irəliləməyi xoşlayır. Çünki topla çox yaxşı rəftar edir. İndidən onu “Real”da hücuma qoşulmağı xoşlayan mərkəz müdafiəçisi kimi görəcəyimiz dəqiqdi. Amma topsuz oyunda bəzi axsayan cəhətləri üzə çıxır. Oyunu alınmadıqda ikili mübarizələrdə tez-tez uduzur. Bəzən aqressiv müdafiə olunmağa və özünü topun qarşısına atmağa üstünlük verir. Ona görə də onu aldadıcı hərəkətlə keçmək asanlaşır. Amma təbii ki, cəmi 20 yaşı olan bu futbolçunun “Real” kimi klubda inkişaf edəcəyi, yeni səviyyəyə yüksələcəyi gözlənilir.

Oynadıqca özünəinamı da, təcrübəsi də artacaq. İlk vaxtlarda onun hər hərəkəti mikroskop altında izlənilən əsas futbolçulardan olmayacağı dəqiqdi. Ancaq bir neçə mövsüm ərzində Höysenin “Real”ın əsas müdafiəçisinə və top-səviyyəli futbolçuya çevrilməsi ehtimalı yüksəkdi. Xabi Alonso belə “brilyantı” parlatmaq” baxımından ən ideal mütəxəssisə bənzəyir. Çünki onun “Bayer-04”ündə, demək olar, bütün mərkəz müdafiəçiləri – Tapsoba, Ta, Kossunu yeni səviyyəyə yüksəldi. Alonso həqiqətən də bu mövqenin oyunçularını inkişaf etdirməyi bacarır.