Nəhayət, Braim Dias milli komanda ilə bağlı seçimini edib. O, qərarını çox götür-qoy edəndən sonra verib.

“Real”ın 24 yaşlı hücumameyilli yarımmüdafiəçi bundan sonra Mərakeş yığmasının formasını da geyəcək. Atası mərakeşli, anası isə ispaniyalı olan Braim İspaniyanın Malaqa şəhərində doğulub. O, bu ölkənin U-17, U-19, U-21 yığmalarında oynayıb, 2021-ci ildə İspaniyanın əsas millisinin heyətində Litvaya qarşı yoldaşlıq matçında iştirak edib, 4:0 hesablı qələbədə bir qol vurmaqla rol oynayıb. Ancaq sonra İspaniya yığmasında oynamaq şansı qazanmayan futbolçu daha gözləmək niyyətində olmadığı üçün Mərakeşi seçib. Qeyd edək ki, Braim pireneylilərin formasını rəsmi matçda daşımadığı üçün yeni qaydalara əsasən özünün yeni milli komandasını müəyyənləşdirmək hüququna malik idi. Atası mərakeşli olduğu üçün bu hüquqdan yararlanıb.

Onun seçimi İspaniyada heç də sakit qarşılanmayıb. Yerli media Diasın Mərakeş millisini seçməsinin İspaniya üçün böyük itki olduğunu vurğulayıb və buna görə ölkənin futbol federasiyasının rəhbərliyini günahlandırıb. Yeri gəlmişkən, Braim bu mövsüm “Real”ın heyətində bütün turnirlərdə 32 matçda meydana çıxıb, 8 qol vurub və 4 məhsuldar ötürmə verib.