Çempionlar Liqasının 1/4 finalında ''Arsenal'' səddini adlaya bilməməklə fanatlarını məyus edən ''Real''da həm baş məşqçi Karlo Ançelottinin, həm də ayrı-ayrı futbolçuların durumu müzakirə mövzusu olmaqda davam edir.

''Football-plus.az'' xəbər verir ki, Kilian Mbappe kimi bir ulduzun gəlişinə baxmayaraq ''kral klubu'' ümumiyyətlə, mövsümü tutulsuz başa vura bilər. Bu arada İspaniyanın ünlü ''Marka'' nəşri oxucular arasında Madrid nəhəngi ilə bağlı bəzi sorğular keçirib.

İlk növbədə fanatların Karlo Ançelottinin yerində kimi görmək istədikləri məlum olub. Bu sorğuda iştirak edənlərin 48 faizi (62505 nəfər) Xabi Alonsoya, 28 faizi (36167) Yürgen Kloppa, 10 faizi (12759) Raul Qonsalesa və 7 faizi (9253) Zinəddin Zidana səs verib.

Digər sual yeni transferlərlə bağlı olub. Sən demə fanatlar ən çox Martin Subimendinin transfer olunmasını istəyirlər. ''Arsenal''ın da hədəfində olan ''Real Sosyedad'' və İspaniya yığmasının 26 yaşlı yarımmüdafiəçisinə sorğuda iştirak edənlərin 33 faizi (35989) səs verib. Maraqlıdı ki, ''istənilən mərkəz hücumçusu'' cavabı bu sorğuda 20 faiz (22114) səslə 2-ci pillədə qərarlaşıb! Yayda transferi həll olunacağı gözlənilən ''Liverpul''lu Trent Aleksander-Arnold isə 18 faiz (19290) toplayaraq 3-cü pillədə qərarlaşıb.

Və nəhayət, oxucular ''bu yay komandanı kim tərk etməlidi'' sualını da cavablandırıblar. Maraqlıdı ki, bu sorğuda zirvədə 12 faiz (106160) səslə Xesus Valyexo qərarlaşıb. Amma bu müdafiəçinin onsuz da komandada varlığı ilə yoxluğu bilinmir və onun uğursuz nəticələrdə bir rolu yoxdu. 28 yaşlı futbolçu bu mövsüm (sentyabrda) cəmi 1 rəsmi qarşılaşmada 10 dəqiqə forma geyib. Bu sorğuda 2-ci pillədə 11 faiz (98541) səslə komandanın kapitanlarından biri - Lukas Vaskes, 3-cü pillədə 10 faiz (88667) səslə zədə üzündən iki mövsümdü, ortalıqda olmayan David Alaba qərarlaşıb.

Digər pillələrdə isə Karlo Ançelotti (9 faiz, 76329), Ferlan Mendi (9 faiz, 74605), Vinisius (7 faiz, 63083) və Luka Modriç (7 faiz, 61440) qərarlaşıb.