Türkiyənin tanınmış mütəxəssislərindən olan Hikmət Karaman sürpriz qərar qəbul edib. ''Football-plus.az'' xəbər verir ki, 65 yaşlı çalışdırıcı ötən ilin oktyabrından Moldova təmsilçisi ''Zimbru''nun başında yer alırdı.

Düzdü, Karaman kişiniyovluları çempion edə bilmədi. Komanda son tura qədər ''Milsami'' və ''Şeriff'' ilə çempionluq mübarizəsi apardı. Yekunda ''Zimbru'' və ''Şeriff'' eyni xalla 2-3-cü pillələri bölüşdürdüsə, ''Milsami'' onları 1 xal üstələyərək çempion oldu.

Bir neçə gün öncə Karaman mövsümün yekunlarından danışarkən komandasını tərifləmiş və yeni mövsümdə Konfrans Liqasında yaxşı çıxış etməyə çalışacaqlarını demişdi. O hətta Mario Balotelli ilə bağlı da etiraf edərək tanınmış futbolçunu Moldovaya gətirməyə çalışdığını, amma onun ''Cenoa''ya keçməyə üstünlük verdiyini vurğulamışdı.

Dünən isə Karamanın istefası ilə bağlı sürpriz xəbər gəldi. Beləliklə, ''Zimbru''da türkiyəli məşqçinin dönəmi başa çatdı. Rəsmi açıqlama verilməsə də, Moldova mətbuatının iddiasına görə rəhbərliklə məşqçi arasında gələcək planlar, transfer üçün ayrılan büdcə kimi məsələlərdə fikir ayrılığı yaşanıb.

Moldovanın 8 qat çempionu olan və 2000-ci ildən bu yana çempionluq sevinci yaşamayan ''Zimbru'' Karamanın başçılığı altında keçirdiyi 20 rəsmi oyundan 13 qələbə, 2 heç-heçə, 5 məğlubiyyətlə ayrılmış oldu.