Türkiyənin 3-cü divizion klubu Kriştiano Ronaldonu transfer etdi
Türkiyənin 2-ci liqa, yəni 3-cü divizion təmsilçisi ''Karaman'' maraqlı 1 aprel zarafatı ilə gündəmə gəlib.
''Football-plus.az'' xəbər verir ki, bu klub Kriştiano Ronaldo ilə müqavilə imzalandığını açıqlayıb. Xəbər klubun rəsmi sosial şəbəkə səhifələrində paylaşılıb. ''Ailəmizə xoş gəldin Kriştiano Ronaldo'' başlığı ilə paylaşılan xəbərdə bu sözlərə yer verilib:
''Karaman'' Futbol Klubu olaraq gənc istedad Kriştiano Ronaldo dos Santos Aveyro ilə ''7+0'' günlük müqavilə imzalamışıq''. Paylaşımın davamında Ronaldonun guya imza mərasimində dediyi sözlərə də yer verilib: ''7'' nömrəli formanı istədim. Amma bu nömrə Polat Yaldıra məxsus olduğu üçün mənə vermədilər. Ona görə də ''70'' nömrəli forma ilə oynayacam. Burdakı stadionda olan atmosfer hətta ''Santyaqo Bernabeu'' və ''Old Trafford''da da yoxdu. Fanatlarımızın önünə çıxmaq üçün səbirsizlənirəm. Onların hər birini sabah evdə ''Somaspor''a qarşı keçirəcəyimiz oyuna dəvət edirəm''.
1992-ci ildə qurulan və 2012-ci ilə qədər həvəskarlar liqasında çıxış edən ''Karaman'' indiyə qədər 3-cü diviziondan yuxarı qalxa bilməyib. Komanda 3-cü divizionun qırmızı qrupunda çıxış edir və 28 oyuna topladığı 33 xalla 12-ci pillədə qərarlaşıb.
Digər xəbərlər
