Çox ciddi maliyyə problemləri yaşayan “Adana Dəmirspor”dan əsas futbolçular bir-bir ayrılmaqdadı.

Ötən həftə portuqaliyalı ulduz Luiş Nani ilə vidalaşmalı olan bu kollektiv son iki gündə daha iki futbolçu ilə yollarını ayırdı. Belə ki, Yusuf Ərdoğan və Mario Balotelli Adana təmsilçisindən rəsmən ayrıldı. Yusuf srağagün pulunu ala bilmədiyinə görə müqaviləsini birtərəfli qaydada ləğv etdi. Adanaya 2022/23-ün qış fasiləsində gələn 31 yaşlı futbolçu bu klubda 40 rəsmi oyuna çıxaraq 7 qol, 4 məhsuldar ötürməlik performans sərgiləyib. Balotellinin isə ayrılmasının səbəbi bilinmir. Ünlü italiyalı forvard dünən “instaqram” səhifəsinin hekayə bölümündə təyyarədən çəkdiyi şəkli göz yaşı emojisi ilə paylaşdı.

Xatırladaq ki, daha öncə 2021/22-də “Adana Dəmirspor”da parlaq performans sərgiləyən, ötən mövsümü isə İsveçrədə keçirən təcrübəli futbolçu cari mövsümün əvvəlində yenidən Adanaya qayıtmağa üstünlük vermişdi. Amma onun budəfəki macərası çox da uğurlu alınmadı. Balotelli bu mövsüm yalnız 16 rəsmi oyuna çıxaraq komandaya 7 qol, 1 məhsuldar ötürməlik fayda verdi. Bu arada Yusuf Ərdoğanın “Qalatasartay”ın maraq dairəsinə düşməsi ilə bağlı xəbərlər var. Futbolçu özü də İstanbulda yaşamaq istəyir və hətta kiçik bir məbləğə də olsa, “Cim-Bom”a imza atmağa razıdı. Yusuf sol cinahda həm vinger, həm də müdafiəçi kimi oynamağı bacarır. Okan Buruk “Qalatasaray”da müdafiənin soluna məhz belə futbolçu axtarır. Yeri gəlmişkən, 31 yaşlı bu futbolçu 2019/20-nin əvvəllərində “Qalatasaray”la anlaşmış, hətta formanı da əyninə geymişdi. Amma o, müqavilə rəsmən açıqlanmadan “Qalatasaray”la formasını paylaşdığı üçün klub tərəfindən anlaşma ləğv edilmişdi.

Bu arada Türkiyə mətbuatında yayılmış xəbərlərə görə, Hikmət Karaman da mövsümün sonunda “Adana Dəmirspor”dan ayrılacaq! Təcrübəli mütəxəssislə rəhbərlik arasında artıq ayrılıqla bağlı razılıq əldə olunub. Halbuki klubun sahibi Murat Sancak yaxınlarda Karamanın gələn mövsüm də bu vəzifədə qalacağını bildirmişdi. Borclar üzündən çox çətin durumda olan və UEFA-dan 3 dönəm üçün transfer cəzası alan Adana təmsilçisində bu yay ciddi dəyişikliklərin olacağı gözlənilir. Bu klubda forma geyən yığmamızın üzvü Şahruddin Məhəmmədəliyevin də ayrılması sürpriz olmayacaq. 64 yaşlı Karaman bu vəzifəyə yanvarda gəlmişdi.