25 sarı, 2 qırmızı vərəqə, “Kəpəz” – “Sumqayıt” oyununun sonundakı kütləvi dava-dalaş...

Mövsüm sona yaxınlaşdıqca əsəblərin gərilməsi, narazıların sayının artması təbiidi. Təsadüfi deyil ki, 34-cü turun oyunlarından sonra birdən-birə üç məşqçi hakimlərdən gileyləndi. Vaqif Cavadov “məncə, hakimlər hər şey etdi ki, “Kəpəz” qalib gəlsin” deməklə “qapını möhkəm çırpdı”, Ayxan Abbasov Fərid Hacıyevdən həmişə narazı qaldığını dedi, onun atası yaşında olan Kurban Berdıyev isə lap “rəngləri qarışdırdı”: “Çox şeyi artıq başa düşə bilmirəm”.           
 
Sabah - Şamaxı, FƏRİD HACIYEV
Düzdü, oyun nəticə baxımdan komandalar üçün prinsipial əhəmiyyət daşımırdı. Lakin bu məqam tərəflərin sona qədər qələbə uğrunda döyüşməsinə mane olmadı. Vasili Berezutski və futbolçuları oyun ərzində ciddi narazılıqla yadda qalmasa da, həm Ayxan Abbasov, həm də oyunçuları ədalət təmsilçisinin xeyli səhvə yol verdiyini düşündü. Hətta baş məşqçi Noqeyranın ikinci qolunun haqsızlıq üzündən buraxıldığını dedi: "Top çıxıb, fol verir. Futbolçunun əziyyətini yerə vurur. Sonra künc zərbəsi verir. Rəqib də həmin epizodda qol vurur".
İş ondadı ki, 70-ci dəqiqəyə təsadüf edən epizodda Rauf Rüstəmli Anatoli Nuriyevi yerə yıxarkən top hələ yan xəttin üzərindəydi. Belədə Fərid Hacıyevi suçlamaq məntiqsizdi. Amma mütəxəssis vərəqələrlə bağlı qərarları qınamaqda haqlıdı. Həqiqətən "fit sahibi" gah çox kobud müdaxilələrə göz yumdu, gah da sadə epizodlarda əlini cibinə apardı. 83-cü dəqiqədə Cəlal Hüseynovun Pavol Şafrankonu qayda pozuntusuyla dayandırmasına isə məhəl qoymadı. Yəni Hacıyev bu dəfə qüsursuz deyildi.

Səbail - Zirə, TURAL QURBANOV
"Səbail" üçün son şans... Bu matçı başqa cür adlandırmaq mümkün deyil. Özü də "Zirə" gümüş medalları rəsmiləşdiribsə... Təhlükəli vəziyyətlərin və qayda pozuntularının sayı çox olmadı. Bu baxımdan hakimin hansısa ciddi sınaqla üzbəüz qalmadığını deyə bilərik. Həm "Səbail"in 76-cı dəqiqədə vurduğu qolun sayılmaması, həm cəzalar, həm də artırılan vaxt etirazla qarşılanmadı. Düzü, buna ehtiyac da yox idi. Komandaların intizamlı oyun sərgiləməyə üstünlük verməsi Tural Qurbanov üçün sərfəli oldusa, baş hakim də hansısa yanlış qərarla yadda qalmadı.   

Turan Tovuz - Neftçi, RƏŞAD ƏHMƏDOV
İlk dəqiqələrdən etibarən mübarizə və gərginlik hiss olunurdu. Əhmədov sabit idarəçiliklə yadda qaldı. Orxan Əliyevin ofsaydda olması düzgün qeydə alındı və Eyyub İbrahimov bu qərarı VAR dəstəyinə ehtiyac olmadan, vaxtında verdi. Kristian da Silvanın Bassala Sambuya qarşı kobudluğu da əsaslı şəkildə cəzalandırıldı və Emin Mahmudovun həmin epizoddan sonra vurduğu gözəl qol oyunun axarına təsir edən anlardan biri oldu. Baş hakim ümumilikdə oyuna nəzarəti əldən vermədi. Ancaq bəzi qayda pozuntularında fasilələrin uzanması tempin düşməsinə səbəb oldu. Rəşad Əhmədov prinsipial mövqe sərgilədi, ciddi səhvə yol vermədi və oyunu ümumilikdə inamla idarə etdi.

Kəpəz – Sumqayıt, İNQİLAB MƏMMƏDOV
İnqilab Məmmədovun 5-ci dəqiqədə Alan Diasın Luis Paçunu kobud şəkildə saxladığı epizodda oyunu davam etdirməsi birmənalı qarşılanmasa da, VAR-dan sonra penalti təyin etmək lazım gəldi. Sona doğru emosiyalar daha da yüksəldi. 86-cı dəqiqədə Georgi Karaişvilinin qeyri-idman hərəkətləri və ardından gələn qarşılıqlı aqressivlik meydanda atmosferi gərginləşdirdi. Hakim bu məqamda prinsipial mövqe tutaraq həm Vüqar Mustafayevi, həm də Rəşad Əzizlini qırmızı vərəqə ilə cəzalandırdı. “Sumqayıt”ın baş məşqçisi Vaqif Cavadovun qərara sərt etirazı isə ona sarı vərəqə “qazandırdı”. Bütün hallarda İnqilab bəy sonda belə hədsiz gərginliyə imkan verməməliydi. 8 sarı, 2 qırmızı vərəqə hadisələrin axarının hakimin nəzarətindən çıxması deməkdi.

Qarabağ - Araz-Naxçıvan, ƏLİYAR AĞAYEV
34-cü turun son matçının tərəflər üçün prinsipallığı qalmamışdı. “Qarabağ”ın çempion olması, “Turan”ın uduzması aşağı tempi şərtləndirdi. Buna baxmayaraq, Əliyar Ağayev VAR-ın köməyi ilə bir neçə vacib qərar verdi. Belə ki, 32-ci dəqiqədə Musa Qurbanlı topu qapıdan keçirsə də, yan xətt hakimi ofsayd bayrağını qaldırdı. VAR-a baxan Ağayev haqlı şəkildə qolu qeydə aldı. 40-cı dəqiqədə “köhlən atlar” yenidən toru sirkələsə də, bayraq yenə də qaldırılmışdı. Bu dəfə də VAR-ın köməyi ilə referi düzgün qərar verdi - qolu qeydə almadı. Təcrübəli FİFA referisi ilk hissədəcə dörd sarı vərəqə göstərdi. Heç bir vərəqəni müzakirə etməyə dəyməz. Amma digər tərəfdən, elə ilk yarıda 4 “sarı”nın göstərilməsi Ağayevin hadisələrin nəzarətdən çıxmasından qorxduğuna işarədi.