20 sarı, böyük müzakirələrə səbəb olan bir penalti, mövsümün ilk VAR-sız oyunu və Vaqif Cavadovun kəskin narazılığı…

Mövsüm bitəndən sonra bu əlamətləri kiməsə xatırlatsaz, 24-cü turun adını çəkəcək. Bəli, ilk cümlələrdən də bəlli olduğu kimi, premier-liqada narazı məşqçilər sırasına Vaqif Cavadov da qoşuldu.

Neftçi – Sumqayıt, TURAL QURBANOV
Kəskin və qarlı hava şəraiti komandaların performansına mənfi təsir etsə də, Tural Qurbanovdan da danışmaq lazımdı. Əlbəttə, o, əlindən gələni etdi. Baxmayaraq ki, qonaq futbolçular tez-tez kobud qayda pozuntularına yol verir, matçda fasilələr yaranırdı. Referi hər iki baş məşqçiyə və “Sumqayıt”ın üç futbolçusuna sarı vərəqə göstərdi. Sadəcə, ümumi fikir belədi ki, bu oyunda penaltilərin sayı bir yox, üç olmalıydı. Casurbel Caloliddinovla Murad Məmmədovun yerdə qaldığı epizodlar da hakimin belə qərarına əsas verə bilərdi. Elvin Bədəlovun Ağadadaş Salyanskiyə yöndəmsiz toxunuşuna görə “nöqtə”nin göstərilməsi haqlı idi. Bununla belə, Vaqif Cavadov oyundan sonra coşdu, nə coşdu:

Araz-Naxçıvan – Səbail, FƏRİD HACIYEV
Əslində bu cümlələri Elmar Baxşıyev kimi təcrübəli mütəxəssisin komandasına aid etmək üzücü haldı. Lakin reallıqdan qaçmaq olmaz. “Araz-Naxçıvan”ın meydan sahibi olduğu matç turun ən cansıxıcı oyunu oldu. Bu azmış kimi, yol verilən xeyli qayda pozuntusu, futbolçuların intizamsız davranışı ümumi ab-havanı xeyli korladı. Bu üzdən Fərid Hacıyevi “qırmızı-ağlar”ın 4, “dənizçilər”in 1 futbolçusuna sarı vərəqə göstərdiyi üçün qınamaq olmaz. Elə Elmar Baxşıyevin “sarı”sı da qaydalar çərçivəsində idi. Bu qədər emosional etiraza nə ehtiyac var, bəy? Axı ədalət təmsilçisi nəticəyə təsir edən səhvlə yadda qalmadı.

Şamaxı – Turan Tovuz, KAMAL UMUDLU
Canlı yayın yox, VAR yox... “Şamaxı” azarkeşlərinin təzyiqi, ağır məsuliyyət və kəskin, qarlı hava şəraiti... Kamal Umudlu böyük ehtimalla karyerasının ən çətin sınağıyla üz-üzə idi. Bəzi hallarda futbolçuların qayda pozuntusuna göz yumdu, bəzən də həqiqətən görmədi ki, “Şamaxı” azarkeşlərinin etiraz səsləri sayəsində səhvini düzəltdi. Uzun müddət Ayxan Abbasovun etirazlarına səbrlə yanaşan “fit sahibi” 32-ci dəqiqədə onu sarı vərəqəylə cəzalandırdı. Ədalət təmsilçisinin komandalara münasibətdə mərhəmətli olduğunu deməkdə də fayda var.

Dəfələrlə futoblçularla şifahi xəbərdarlıq etdi, yalnız əndazəni aşan kobud müdaxilələrdə əlini cibinə atdı və “Şamaxı”nın üç, “Turan Tovuz”un iki futbolçusuna “sarı” göstərdi. Hər halda, matçın taleyini Umudlu yox, komandaların performansı təyin etdi. Ayxan Abbasov demişkən, bir-iki epizodda VAR-a ehtiyac var idi ki, bunun günahkarı hakim yox, təbiətdi.

Qarabağ – Sabah, ƏLİYAR AĞAYEV
Referi dinamik matçın öhdəsindən layiqincə gəldi. Komandalar kobudluğa yol vermir, qaydalara maksimum dərəcədə əməl etməyə çalışırdı. Əliyar bəy meydan sahiblərinə 1, qonaqlara 2 sarı vərəqə göstərdi ki, hamısı haqlı idi. Referi oyunboyu sərt mübarizənin yaşanmasına, daimi fasilələrə əngəl ola bildi. Əliyar Ağayevlə köməkçilərinin oyunu qüsursuz idarə etdiyini deyə bilərik. Belədə hakimlər briqadasının işini əla qiymətləndirmək mümkündü.

Zirə - Kəpəz, RAUF CABBAROV
Oyun yetərincə sürətli və gərgin mübarizə şəraitində keçdi. Referi futbolçulara 4 sarı vərəqə göstərdi ki, bunlar komandalar arasında bərabər bölündü. Rauf bəy vəzifəsinin öhdəsindən layiqincə gələ bildi. Hər iki komandanın baş məşqçisi oyunboyu bəzi epizodlarla bağlı 4-cü hakimə narazılıq etsələr də, oyunsonrası mətbuat konfransında hakim idarəçiliyi ilə bağlı fikir bildirən olmadı.