''Tək mənim üçün yox, ''Qalatasaray'' və Türkiyə futbolu üçün də özəl bir gündü. Türkiyədən bir klubun Avropada titul qazanması çox böyük bir hadisə idi. Bu uğurda tək oyunçuların yox, rəhbərlikdən başlayaraq bazanın ən adi işçisinə qədər hər kəsin əməyi var. Yəni bu kubok hamımızındı. O qədər güclü heyətimiz var idi ki, ''Qalatasaray''dan 13 futbolçu Türkiyə yığmasına yollanmışdı. Belə uğurlar təsadüf nəticəsində qazanılmır. 4-5 il çalışaraq, ciddi əmək sərf edərək bu zəfəri əldə etdik. Qırmızı vərəqədən sonra oyunu necə izlədim? Elə adi azarkeş kimi izləmək məcburiyyətində qaldım. Amma bizi durdura bilməyəcəklərinə əmin idim. O ''Qalatasaray'' çox cəsarətli idi. Möhtəşəm komandamız var idi. Fanatlarımızla birlikdə inanılmaz sevinc yaşadıq. Belə tarixi uğurlar insanı psixoloji cəhətdən daha da güclü edir. Çünki bütün ölkəni sevindirməyi bacarırsan. Həm də müqaviləmdə Avropada titul qazanılması ilə bağlı xüsusi maddə var idi. Həmin maddə sayəsində daha çox pul qazandım. Mən əslində müqaviləyə imza atdığım gün Avropada titul qazanacağımızı demişdim. ''Qalatasaray'' ona qədər avrokuboklarda yarımfinal görmüşdü. Amma finala yüksəlmək zamanı idi. İstək, çalışma əzmi, səni dəstəkləyən rəhbərlik və klub varsa, niyə də olmasın? İndiki ''Qalatasaray'' da çox yaxşı çıxış edir. Bu qədər çempionluq mübarizəsi aparmaq, ardıcıl çempionluqlar qazanmaq heç də asan deyil. Komandada hər şey çox yaxşı və düzgün şəkildə planlaşdırılıb. Okan Buruk əsil qalib mentalitetinə malikdi. O da bizim tarix yazan komandanın önəmli bir parçası idi. Mənim yaxın dostlarımdan biridi. Bu çempionluqlar ''Qalatasaray''ı daha da güclü və nüfuzlu edir. Ümid edirəm ki, bu komandaya da Avropada uğurlu çıxış etmək qismət olacaq''.