Lionel Messi tezliklə yenidən milli formada görünəcək. Ulduz futbolçu qarşıdakı oyunlar üçün Argentina yığmasına çağırılıb.

"Football-plus.az" xəbər verir ki, “İnter Mayami”nin hücumçusu DÇ-2026-nın seçmə mərhələsinin Çili və Kolumbiya ilə oyunlarında milli komandaya kömək edəcək. Bu barədə yerli futbol qurumunun mətbuat xidməti məlumat yayıb.

Qeyd edək ki, Messi yığmanın martda keçirdiyi Uruqvay və Braziliya ilə oyunlarında zədə səbəbindən iştirak etməmişdi. İndi səhhətində heç bir problem olmayan 37 yaşlı dünya çempionu qarşıdakı matçlara hazırdı.

Argentina iyunun 6-da Çili, 11-də isə Kolumbiya ilə qarşılaşacaq. Yeri gəlmişkən, Lionel Skaloninin çalışdırdığı komanda artıq mundialın final mərhələsinə vəsiqə qazanıb.

Lionel ilə bağlı yayılan digər xəbər də maraqlıdı. Onun möhtəşəm karyerası ərzində vurduğu saya-hesaba gəlməyən qollarından biri “A Goal in Life” layihəsi ilə sənət əsərinə çevriləcək. Bu barədə Messi özü açıqlama verib. Layihəyə əsasən, səbəbkar vurduğu qollardan birini seçəcək. Həmin qol türk dizayner Rafik Anadol tərəfindən əsərə çevriləcək. Bu əsər isə “Christie’s” hərrac evində satışa çıxarılacaq. 

Messinin seçdiyi qol mayın 22-də “İnter Mayami”nin sosial şəbəkə hesablarında da paylaşılacaq. Əsər üçün toplanan pul Latın Amerikasında və Karib hövzəsindəki 5 ölkədə yaşayan uşaqlara ayrılacaq. Onu da bilin ki, Messi sevimli qolunu seçməkdə çətinlik çəkəcəyini bildirib.