Lionel Messi Argentina yığmasına qarşıdakı matçlarda kömək edə bilməyəcək.

“İnter Mayami”nin ulduz futbolçusu DÇ-2026-nın seçmə mərhələsinin iki oyunu üçün milli komandanın heyətinə daxil edilməyib.

Argentina Futbol Assosiasiyasının mətbuat xidmətinin dərc etdiyi siyahıya 28 futbolçu daxil edilib. Rəsmi məlumatda hücumçunun Amerika Kubokunun Kolumbiya ilə iyulun 14-də keçirilən final oyununda aldığı zədəsini hələ sağaltmadığı bildirilib.

Qeyd edək ki, Argentina sentyabrın əvvəlində Çili və Kolumbiya ilə qarşılaşacaq. Lionel Skaloninin çalışdırdığı komanda seçmə turnirdə keçirilən 6 turun yekunlarına görə 15 xalla qrupa başçılıq edir.
Yeri gəlmişkən, Messinin yaşıl meydana nə vaxt qayıdacağı məlum olub.

Argentina millisinin kapitanı zədəsini sağaltmaq üzrədi. 36 yaşlı futbolçu fərdi proqram üzrə məşqləri davam etdirir. O, tezliklə komanda ilə məşqlərə başlayacaq. Forvardın sentyabrın 1-də keçiriləcək “Çikaqo Fayr”la matçda meydana çıxacağı istisna olunmur. Lakin məşqçilər heyətinin əsas məqsədi onu “Filadelfiya Yunion” ilə sentyabrın 14-nə təyin olunan oyun üçün hazırlamaqdı.