Messi komandanı kənardan dəstəkləyəcək
Lionel Messinin Argentina yığmasına qarşıdakı oyunlarda kömək edə bilməyəcəyini xəbər vermişdik.
Ulduz futbolçu zədə səbəbindən bu ay milli formada görünməyəcək.
“İnter Mayami”nin 37 yaşlı hücumçusu MLS-in “Atlanta Yunayted” ilə son matçında sıradan çıxıb. Mayamililərin 2:1 hesablı qələbəsi ilə başa çatan oyunda Messi bir qol vurub.
Matçdan sonra tibbi müayinədən keçən dünya çempionunun zədə aldığı məlum olub. Lionel bu səbəbdən milli komandasının DÇ-2026-nın seçmə mərhələsində Uruqvay və Braziliya ilə keçirəcəyi oyunları üçün heyətə daxil edilməyib. Messi buna görə çox məyus olduğunu bildirib:
“Uruqvay və Braziliya ilə vacib oyunları buraxmalı olmağım məyusedicidi. Çox istəyirdim ki, oynayım, amma kiçik zədəyə görə milli komandaya qoşula bilməyəcəm. Hər bir argentinalı azarkeş kimi komandanı kənardan dəstəkləyəcəyəm. İrəli, Argentina!”
“İnter Mayami”nin futbolçunun durumu ilə bağlı yaydığı məlumatda belə deyilir: “Messi əzələsinin vəziyyətinin qiymətləndirilməsi üçün MRT müayinəsindən keçdi.
O, “Atlanta” ilə oyunda diskomfort hiss etmişdi. Müayinənin nəticələri onun əzələsində yüngül zədənin olduğunu təsdiqlədi. Onun qarşıdakı oyunlarda iştirak edib-etməyəcəyini hələ bilmirik”.
Digər xəbərlər
