Mayın 23-25-i aralığında keçiriləcək “4-lər finalı”na vəsiqə qazanan son iki komanda da bəllidi.

Belə ki, “Monako” “Barselona”nı, “Panatinaikos” isə “Efes”i mübarizədən kənarlaşdırmağı bacardı. “Pivəçilər” seriyanın 5-ci – həlledici oyununda yunanlara 8 xal fərqi ilə uduzdu.

Yeri gəlmişkən, seriyanın 4-cü oyunundan sonra qalmaqal yaranmışdı. “Panatinaikos”un sahibi Dimitris Yannakopulos komandasının 82:85 uduzduğu oyundan sonra Avroliqa rəhbərliyini ən sərt sözlərlə tənqid etmişdi. 2-ci oyundan sonra da eyni davranışla yadda qalan 60 yaşlı iş adamı Avroliqanın prezidenti Deyan Bodiroqa ilə hakimlər korpusunun başçısı Daniel Hierresuelonu 5-ci oyunu izləməyə də dəvət etmişdi.

Avroliqanın İntizam Komissiyası Yannakopulosun hərəkətlərini cəzasız qoymayıb. “Pao”nun rəhbəri 100 min avro cərimələnib. Yannakopulos “Pao”nun sahibi olmaqla yanaşı, “Vianex” şirkətinin direktorlar şurasının prezidenti və baş icraçı direktorudu.
Onu da xatırladaq ki, “4-lər finalı” tarixdə ilk dəfə Avropadan kənarda – Birləşmiş Ərəb Əmirliklərinin paytaxtı Əbu-Dabidə keçiriləcək. Bu il mükafat uğrunda “Olimpiakos”, “Fənərbaxça”, “Monako” və “Panatinaikos” mübarizə aparacaq.

1/4 final, 5-ci oyun
Monako (Fransa) – Barselona (İspaniya) 85:84 (15:19, 30:20, 20:23, 20:22)
Seriyada hesab – 3:2.
Panatinaikos (Yunanıstan) – Efes (Türkiyə) 75:67 (18:10, 23:20, 12:16, 22:21)
Seriyada hesab – 3:2.