Çempionlar Liqasında olduğu kimi bu həftə Avropa Liqasında da əsas mərhələnin 7-ci turuna yekun vuruldu.

''Football-plus.az'' xəbər verir ki, gələn həftə baş tutacaq son tur ərəfəsində nəfəslər tutulub. Türkiyənin hər 3 təmsilçisinin yola davam etmək şansı var. ''Qalatasaray'' zatən pley-offu çoxdan təmin edib. Okan Burukun komandası son turda səfərdə ''Ayaks''ı məğlub edəcəyi təqdirdə bir mərhələ oynamaqdan qurtulacaq və ilk ''8-liy''ə düşərək birbaşa 1/8 finala yüksələcək.

Hazırda 9-cu pillədə qərarlaşan ''Cim-Bom''a digər oyunların nəticələrindən asılı olaraq 1 xal da kifayət edə bilər. Amma bu ehtimal cüzidi. 9-24-cü pillədəkilər məlum olduğu kimi pley-offda oynayacaq. Son tur ərəfəsində ''Fənərbaxça'' 23-cü, ''Beşiktaş'' 24-cü pillədə qərarlaşıb. Joze Mourinyonun kollektivini son turda səfərdə ''Midtyullann'', Ole Qunnar Sulşerin kollektivini isə səfərdə ''Tvente'' ilə çətin oyunlar gözləyir. Bərabərlik digər oyunların nəticələrindən asılı olaraq onların da işinə yaraya bilər. Bunu son açıqlamasında Mourinyo da vurğulamışdı. Amma təbii ki, başqalarından asılı olmamaq üçün həm ''Fənər'', həm də ''Beşiktaş'' ilk növbədə qələbəyə can atmalıdı.

Yeri gəlmişkən, pley-off üçün indidən çox intriqalı bir variant mövcuddu. Qaydalara əsasən pley-offda 9 və 24-cü, 10 və 23-cü, 11 və 22-ci, 12 və 21-ci, 13 və 20-ci, 14 və 19-cu, 15 və 18-ci, 16 və 17-ci komandalar bir-biri ilə qarşılaşacaq. Az öncə də qeyd etdiyimiz kimi ''Qalatasaray'' son tur ərəfəsində 9-cu, ''Fənər''lə ''Beşiktaş'' isə uyğun olaraq 23 və 24-cü pillələrdə qərarlaşıb. Bu da o deməkdi ki, pley-offda İstanbul derbisinin şahidi ola bilərik. ''Qalatasaray''ın ya ''Fənər''ə, ya da ''Beşiktaş''a rəqib olmaq ehtimalı yüksəkdi. ''Qalatasaray''la ''Fənər'' düşəcəyi təqdirdə futbolsevərlər qısa müddət ərzində ardıcıl 3 tarixi İstanbul derbisini izləmək fürsəti qazanacaq. Çünki pley-offun ilk oyunu fevralın 13-də, cavab oyunu fevralın 20-də keçiriləcək.

Həmin həftəsonu, daha dəqiq desək, fevralın 23-də isə əzəli rəqiblər həm də Türkiyə çempionatı çərçivəsində qarşılaşacaq. Türkiyənin yoluna 3 komanda ilə davam etməsi həm də UEFA-nın əmsallar cədvəli baxımından da önəmlidi. Türkiyə hazırda 41,700 xalla 10-cu pillədədi. 9-cu pillədəki Çexiyanın 42,650 xalı var. Çexiyanın 3 təmsilçisindən 2-nin mübarizəni dayandıracağı dəqiqdi. ''Sparta''nın ÇL-də, ''Slaviya''nın isə AL-də pley-off şansı qalmayıb. Yalnız Plzen ''Viktoriya''sı AL-də pley-offu təmin edib. Türkiyənin əmsallar cədvəlini 9-cu pillədə bitirməsi ona görə vacibdi ki, çempionatda 2-ci pilləni tutan komanda növbəti mövsüm ÇL-də mübarizəyə 2-ci yox, 3-cü təsnifat mərhələsindən başlayacaq. Necə ki, ötən mövsüm Türkiyə artıq bunu bacararaq 9-cu olmuşdu.

Bu da o deməkdi ki, bu mövsüm superliqanı 2-ci pillədə tamamlayan kollektiv 2025/26-da ÇL-də mübarizəyə 3-cü təsnifat mərhələsindən başlayacaq.

ƏLİ