Srağagün Konfrans Liqasının yarımfinalının cavab oyununda “Fiorentina” ilk görüşdə 1:2 hesabıyla uduzduğu “Bazel”i səfərdə 3:1 yenərək adını finala yazdırdı.

"Football-plus.az" xəbər verir ki, iş elə gətirmişdi ki, oyundan öncə türkiyəli futbolsevərlər florensiyalılara azarkeşlik edirdilər. Çünki ölkələr üzrə əmsallar cədvəlində 12-ci pillədə qərarlaşan Türkiyə 13-cü pillədəki İsveçrədən cəmi 0,425 xal öndə idi. “Bazel” mərhələni adlayıb finala yüksəlsəydi, Türkiyə 13-cü pilləyə geriləyəcəkdi. Bu isə tam yeni formatda oynanılmağa başlanacaq 2024/25-də qardaş ölkənin klublarının durumuna təsir edəcəkdi. Belə ki, ölkə kubokunun qalibi Avropa Liqasının təsnifatında mübarizəyə pley-offdan yox, 3-cü mərhələdən başlamalı olacaqdı. Türkiyə çempionatının üçüncüsü isə Avropa Liqasının 2-ci təsnifat mərhələsi əvəzinə KL-in 2-ci təsnifat mərhələsində oynamaq məcburiyyətində qalacaqdı. Ona görə də florensiyalıların 120+9-cu dəqiqədə qələbə qolunu vurması Türkiyəni də sevindirdi. “ÇL zonası”na isə bu oyunun nəticəsi istənilən halda təsir göstərmirdi. Çünki Türkiyə klubları bu mövsüm uğurlu çıxış edərək önəmli reytinq xalları qazandılar. Gələn mövsüm superliqanın çempionu 2024/25-də mübarizəyə ÇL-in pley-offundan, 2-ci yerin sahibi isə 2-ci təsnifat mərhələsindən başlayacaq.