Avropa Liqasında bu həftə əsas mərhələyə yekun vuruldu.

''Football-plus.az'' xəbər verir ki, Türkiyəni bu turnirdə təmsil edən 3 İstanbul nəhəngindən biri - ''Beşiktaş'' pley-offa vəsiqə qazana bilməyərək mübarizəni dayandırmalı oldu.

''Qalatasaray''la ''Fənərbaxça'' isə birbaşa 1/8 finala vəsiqə əldə edə bilməsələr də, pley-offda oynamağa haqq qazandılar.

''Fənər'' pley-offda ''Anderlext'', ''Qalatasaray'' isə ''Alkmaar'' ilə qarşılaşacaq. Bu arada Türkiyə klublarının indiyə qədər bu mövsümkü avrokubok macərasından qazandıqları məbləğ bəlli olub. UEFA bu mövsüm oyunların sayının artması ilə əlaqəli olaraq keçmişdəki çıxışlara görə də klublara pul ayırıb.

''Fənər'' və ''Qalatasaray'' bu mövsüm mübarizəyə ÇL-in təsnifatında başlamış və daha sonra AL-də çıxışını davam etdirmişdi. ''Beşiktaş'' isə ölkə kubokunun son qalibi kimi mübarizəyə AL-in təsnifatının pley-offundan başlamışdı. Öncə ''Qalatasaray''dan başlayaq. Türkiyənin son çempionu ÇL-in təsnifatının pley-offunda iştirak etdiyi üçün 4,29 milyon avro, AL-də iştirak haqqı kimi 4,31 milyon avro, yayın gəliri qismində 3,91 milyon avro, 10 illik performans gəliri qismində 1,20 milyon avro, əsas mərhələdə qazanılan xalların gəliri kimi 1,95 milyon avro, turnir cədvəlindəki mövqeyin görə 2,21 milyon avro, pley-offa vəsiqə qazandığı üçün də 300 min avro olmaqla ümumilikdə 18,1 milyon avro gəlir əldə edib.

''Fənərbaxça'' ÇL-in 3-cü təsnifat mərhələsində oynadığına görə 180 min avro, AL-də iştirak haqqı 4,31 milyon avro, yayın gəliri 5,64 milyon avro, 10 illik performans gəliri 1,77 milyon avro, qazanılan xalların gəliri olaraq 1,5 milyon avro, turnir cədvəlindəki mövqeyinə görə 1 milyon avro və pley-offa vəsiqə qazanmağa görə 300 min avro olmaqla 14,7 milyon avro pul qazanıb.

''Beşiktaş'' isə AL-də iştirak haqqı kimi 4,31 milyon avro, yayın gəliri 2,39 milyon avro, 10 illik performans gəliri 1,93 milyon avro, topladığı xallara görə 1,35 min avro, turnir cədvəlindəki mövqeyinə görə də 750 min avro olmaqla 10,7 milyon avro qazanıb.

ƏLİ