Məlum olduğu kimi, Juninyo “Sevilya”da oynamaq ehtimalının üzərindən xətt çəkdi. Demək olar ki, bütün detalların razılaşdırıldığı anda La Liqa təmsilçisinə “yox” deyən futbolçu karyerasını Braziliya “Flamenqo”sunda davam etdirmək eşqinə düşdü.

İndi açıq suallar çoxdu ki, bunlardan birinə aydınlıq gətirmişik. Juninyonun vətənindən gələn təklifə isti baxmasının əsas səbəbləri daha çox maaş və forma şansı qazanmaqdı. Yəni futbolçunun qərarına təsir edən ən ciddi məqam puldu.

“Football-plus.az” xəbər verir ki, hər şey bununla yekunlaşmır. Dəqiq desək, “Globo” “Flamenqo”nun baş məşqçisi Felipe Luisin həftəsonu Juninyoya zəng etdiyini və “Sevilya” sevdasında vaz keçirə bildiyini yazıb.

Braziliya nəşrinin iddiasına görə, klubun planı yanvarın 10-da Juninyo ilə üçillik müqavilə imzalamaq və ABŞ-də baş tutacaq təlim-məşq toplanışında iştirakını təmin etməkdi. Adı çəkilən media orqanı Juninyonun məlum qərarının “Qarabağ”ı qəzəbləndirdiyini də bildirib. İddiaya inansaq, “Flamenqo” futbolçu üçün “köhlən atlar”a 5 milyon avro təzminat ödəmək istəyir. Ağdamlıların şərtləri isə daha sərtdi.

Bəs Juninyo hazırda hardadı? Onun “Qarabağ”a keçidində vasitəçi olan, agenti ilə əməkdaşlıq müqaviləsi olduğundan prosesdə iştirak edən menecer Tural Əsgərlinin saytımıza verdiyi məlumata görə, futbolçu hələ ki Bakıdadı. Daha doğrusu, bu saat 20.00-a olan məlumat idi. Sonra Juninyo “instaqram” hesabında qəribə video yaydı. Belə görünür ki, o, artıq vətəninə uçub.

KƏNAN BAHADIR