Fransa çempionatında başa çatmaqda olan mövsümün laureatları müəyyənləşib. Müxtəlif nominasiyaların qaliblərinin adı mayın 11-də keçirilən tədbirdə açıqlanıb.

PSJ-nin hücumçusu Usman Dembele 2024/25 mövsümü üçün Liqa 1-in ən yaxşı oyunçusu seçilib. 27 yaşlı futbolçu mükafatı Fransa Peşəkar Futbolçular İttifaqından alıb. Dembele bu mövsüm Liqa 1-də meydana çıxdığı 28 matçda 21 qol vurub və 8 məhsuldar ötürmə verib. Mövsümün ən yaxşı qapıçısı Lukas Şevalye (Lill), ən yaxşı gənc oyunçusu Dezire Due (PSJ), ən yaxşı məşqçisi Luis Enrike (PSJ), Fransadan kənarda çıxış edən ən yaxşı oyunçu isə Kilian Mbappe (Real) seçilib.

Fransa Peşəkar Futbolçular İttifaqı 2024/25 mövsümü üçün Liqa 1-in rəmzi komandasını da təqdim edib. Heyətdəki 11 futbolçudan 9-u PSJ-də, qalan 2 oyunçu isə “Lion”da və “Lill”də çıxış edir.

Mövsümün rəmzi komandası: qapıçı - Lukas Şevalye (Lill); müdafiəçilər - Əşrəf Hakimi, Markinyos, Uilyam Paço, Nunu Mendeş (hamısı PSJ); yarımmüdafiəçilər -Joao Neveş, Vitinya (hər ikisi PSJ), Rayan Şerki (Lion); hücumçular - Usman Dembele, Bredli Barkola, Dezire Due (hamısı PSJ).