Kriştiano Ronaldo klubunu tezliklə tərk edə bilər. “Əl-Nəssr” artıq onunla əməkdaşlıqda maraqlı deyil.
"Football-plus.az" xəbər verir ki, Səudiyyə Ərəbistanı çempionatının 30-cu turunun “Əl-İttihad”la oyunundan (2:3) sonra hücumçunun davranışı klub rəhbərliyinin xoşuna gəlməyib.

Final fitindən dərhal sonra stadionu tərk edən portuqaliyalı futbolçu əsəbi jestlər edib və nəticədən narazılığını bu şəkildə bildirib. “Marca” nəşrinin xəbərinə görə, bu vəziyyətdən sonra Ronaldo ilə “Əl-Nəssr” arasında yeni müqavilə ilə bağlı danışıqlar dayandırılıb.

Ulduz futbolçunun klubla hazırkı müqaviləsinin müddəti 2026-cı ilin yayında başa çatacaq. Buna baxmayaraq, Kriştiano paytaxt komandasını bu yay tərk edə bilər.

“Əl-Nəssr” Səudiyyə Ərəbistanı Pro Liqasında sona 4 tur qalmış lider “Əl-İttihad”dan 11 xal geri qalırdı. Lider 31-ci turda “Əl-Fayha”ya qalib gəldiyindən Ronaldonun komandası çempion olmaq şansını itirib.

Qeyd edək ki, “Əl-Nəssr”də 2023-cü ilin əvvəlindən çıxış edən 40 yaşlı futbolçu bu mövsüm bütün turnirlərdə 39 oyuna 33 qol vurub və 4 məhsuldar ötürmə verib.