Türkiyənin 1-ci liqasında mövsümün sonuncu - 38-ci turunun oyunları keçirildi.

''Football-plus.az'' xəbər verir ki, paytaxtın iki təmsilçisi - ''Gənclərbirliyi'' və ''Ankaragücü'' mövsümü tamamilə fərqli ab-havada bitirdi. ''Ankaragücü'' son turda ''Amed Sportif Fəaliyyətlər''i 2 cavabsız qolla məğlub etsə də, acı sonluqdan qurtula bilmədi. ''Ankaragücü'', ''Pendikspor'' və ''Manisa'' mövsümü eyni - 48 xalla tamamladı. Amma bu 3 komandanın öz aralarındakı oyunlarda ən az xal toplayan kollektiv məhz ''Ankaragücü''dü. Ona görə də ''Ankaragücü'' ''Yeni Malatyaspor'', ''Adanaspor'' və ''Şanlıurfaspor''un ardından 2-ci liqaya, yəni 3-cü diviziona yuvarlanan 4-cü komanda oldu. Bu cür köklü klub tarixində cəmi 2-ci dəfə 3-cü diviziona yuvarlandı. İlk dəfə ankaralılar 2013-də bu aqibətlə üzləşmiş və 2017-yə qədər bu turnirdə çıxış etməli olmuşdular. ''Ankaragücü'' ardıcıl 2-ci mövsümdə çıxış etdiyi turnirdə yerini qoruya bilmədi. Komanda ötən mövsüm superliqanı tərk etmişdisə, bu mövsüm də göründüyü kimi 1-ci liqada möhkəmlənə bilmədi. Maraq üçün bildirək ki, ''Ankaragücü'' İstanbul nəhənglərindən sonra Türkiyə futbolunun elitasında ən çox (53) mövsüm keçirən klub statusundadı. Amma paytaxtın digər klubunda əksinə yüksək əhval-ruhiyyə hökm sürür.

Belə ki, ''Gənclərliyi'' son turda ''Yeni Malatyaspor''u 5:0 darmadağın edərək ikinci pilləni rəsmiləşdirdi. Bu da o deməkdi ki, ''Gənclər'' ''Kocaelispor''un ardından elitaya vəsiqə qazanan 2-ci komanda oldu! Bu kollektiv sonuncu dəfə 2020/21-də superliqada mübarizə aparmışdı. Bu, ''Gənclərbirliyi''nin elitada ümumilikdə 49-cu mövsümü olacaq. Baş məşqçi Hüseyin Eroğlu yenə adından söz etdirməyi bacardı. Bu vəzifəyə dekabrda gələn təcrübəli mütəxəssis son 3 mövsümdə 2-ci komandanı elitaya daşıdı. O, eyni uğuru 2022/23-də ''Samsunspor''la yaşamışdı. Onu da bildirək ki, 1-ci liqanın yekunlarına əsasən 3-cü pilləni tutan ''Fatih Karagümrük'' birbaşa pley-offun finalında oynamağa haqq qazandı.

Digər finalçı ''İstanbulspor'' - ''Boluspor'', ''Bandırmaspor'' - ''Ərzurumspor'' cütlərinin qalibləri arasında keçiriləcək oyunda bəlli olacaq.