Türkiyə çempionatının 26-cı turu çərçivəsində bazar günü keçiriləcək “Ankaragücü” – “Qalatasaray” matçından öncə stadionla bağlı polemikaya son qoyulub.

"Football-plus.az" xəbər verir ki, İstanbul nəhəngi həmin qarşılaşmanın başqa stadionda keçirilməsi üçün rəsmən Türkiyə Futbol Federasiyasına müraciət etmişdi. Məsələ burasındadı ki, paytaxtın iki nəhəng klubu – “Ankaragücü”nün və “Gənclərbirliyi”nin ev oyunlarını keçirdiyi “Eryaman” stadionunun ot örtüyü heç də yaxşı durumda deyil. Hələ fevralın 2-də “Ankaragücü” – “Sivasspor” matçının (0:0) ardından ankaralıların baş məşqçisi Əmrə Belözoğlu öz stadionlarının ot örtüyündən ciddi şəkildə gileylənmişdi. Həmin qarşılaşmadan sonra bu arenada daha üç oyun keçirildi. Başqa sözlə desək, fevralın 2-8-i aralığında “Eryaman”da 4 oyun baş tutdu. Ən son fevralın 8-də kubok çərçivəsində bu stadionda keçirilən “Gənclərbirliyi” – “Trabzonspor” oyununun (1:2) ardından ot örtüyünün durumu geniş müzakirə doğurmuşdu. “Qalatasaray” da məhz bu üzdən futbolçuların sağlamlığını düşünərək matçın başqa stadiona keçirilməsini istəmişdi. Amma fevralın 8-dən sonra stadion ot örtüyünün bərpası üçün 10 günlüyə bağlandı. Dünən Türkiyə Futbol Federasiyasının rəsmiləri örtüyün son durumunu yoxlamaq və yekun qərarı vermək üçün “Eryaman”a yollandılar. Onlar hələ ki bu stadionda oynamağın mümkün olduğuna qərar verdilər. Başqa sözlə desək, fevralın 18-da “Ankaragücü” – “Qalatasaray” matçı məhz bu stadionda keçiriləcək. Amma federasiyanın rəsmi açıqlamasında iki məqam diqqəti cəlb edir. Birincisi, 1-ci liqa təmsilçisi “Gənclərbirliyi” yeni bir qərara qədər ev oyunlarını başqa stadionda keçirməli olacaq. Bundan başqa, öz stadionlarının ot örtüyünə nəzarət etmələri və örtüyün lazımi səviyyəyə gətirilməsi üçün federasiyadan “Ankaragücü”, “Kayserispor” və “Çaykur Riəzspor”a xəbərdarlıq edilib. Növbəti yoxlamalar zamanı bu klubların stadionlarının ot örtüyündə qüsur aşkarlansa, ev oyunlarını başqa stadionda keçirməli olacaqlar.