Misli premyer-liqasının 34-cü turu çərçivəsində keçiriləcək iki matç iki komandanın çempionatdakı taleyinə aydınlıq gətirə bilər. Söhbət "Səbail" - "Zirə", "Kəpəz" - "Sumqayıt" oyunlarından gedir.

Bilindiyi kimi, "dənizçilər" 22 xalla sonuncu, "sarı-göylər" 29 xalla 9-cu pillədədi. Bayıl təmsilçisi "qartallar"a uduzsa, premyer-liqanı tərk etməsi rəsmiləşəcək ki, böyük ehtimalla, qarşılaşma məhz belə nəticələnəcək. Belədə gəncəlilər "kimyaçılar"la matçda komandanın elitada yerini qorumasını bayram edəcək.

"Football-plus.az" xəbər verir ki, "Kəpəz"in fanklubu "Xəmsə" artıq bununla bağlı hazırlığa başlayıb. Rəsmi sosial şəbəkə hesablarında gəncəli tərəfdarlara müraciət edən azarkeş qrupu onları qarşılaşmanın baş tutacağı Tovuz şəhər stadionuna gəlməyə çağırıb.

Bəs, gəncəlilər bu çağırışa hay verəcəkmi? Tribunalarda həmişə olduğu kimi 400-500 tamaşaçı görünəcək, yoxsa böyük çətinliklərə baxmayaraq, yenə premyer-liqada qalmağı bacaran komandanın sevincini daha çox azarkeş bölüşəcək? Bunu zaman göstərəcək.

Xatırladaq ki, "Səbail" - "Zirə" matçı bu gün, "Kəpəz" "Sumqayıt" oyunu isə sabah keçiriləcək.

KƏNAN BAHADIR