"Kəpəz" bu gün Misli premyer-liqasının 30-cu turu çərçivəsində "Araz-Naxçıvan"ı qəbul edəcək.

Təbii ki, hər iki komandanın qələbəyə hava-su kimi ehtiyacı var. Premyer-liqada qalmaq uğrunda mübarizə aparan "sarı-göylər" "Səbail"lə aradakı xal fərqini artırmağa, avrokuboklara yollanmaq istəyən "qırmızı-ağlar" isə ilk "üçlük"dəki mövqeyini möhkəmləndirməyə çalışacaq.

"Football-plus.az" xəbər verir ki, gəncəli tərəfdarlar bu ərəfədə sosial şəbəkələrdə tovuzlu azarkeşlərə müraciət edib və bugünkü matçda stadiona gəlib "Kəpəz"i dəstəkləməyə çağırıblar.

Bu çağırış əsassız deyil. Çünki "sarı-göylər"in mümkün qələbəsi "Turan Tovuz" üçün də çox vacibdi. Dəqiq desək, belədə "bozqurd"la "Araz-Naxçıvan"ın arasındakı 4 xal fərqi olduğu kimi qalacaq. Həmçinin, tovuzlular növbəti turda naxçıvanlıların qonağı olacaq. "Turan Tovuz" bu oyunda qələbə qazansa, ilk "üçlüy"ə doğru çox ciddi addım atmış olacaq.

Xatırladaq ki, Kurban Berdıyevin komandasının avrokuboklara yollanmaq üçün iki yolu var: ya mövsümü ilk "üçlük"də bitirmək, ya da ölkə kubokunun "Qarabağ" və ya "Araz-Naxçıvan"a qismət olması. Gəncəli azarkeşlər məhz bu üzdən tovuzlu tərəfdarlardan dəstək gözləyir.

Qısası, bugünkü qələbə Qərb təmsilçiləri üçün çox önəmlidi. Bəs, tovuzlu tərəfdarlar əzəli rəqiblərini dəstəkləyəcəklərmi? Bunu Tovuz şəhər stadionunda, saat 17.00-da start götürəcək matç zamanı öyrənəcəyik.

KƏNAN BAHADIR