Premyer-liqada mövsümün sonuna 4 tur qalmış “Kəpəz” 28 xalla 9-cu, “Səbail” isə 21 xalla 10-cu pillədə qərarlaşıb. Əlbəttə, bu komandaların şəxsi dueli qalsaydı, kimin elitada yerini qoruyacağı ilə bağlı daha aydın mülahizə yürütmək olardı. Hərçənd hadisələrin indiki axarı üzrə də gəncəlilər bu yolda daha şanslıdı.

Bəs qalan turların təqvimi nə deyir?

İcazənizlə təqvim əsasında münəccimlik edək. “Kəpəz” 33-cü turda “Neftçi”nin, 35-ci turda “Qarabağ”ın, 36-cı turda “Turan Tovuz”un qonağı olacaq, 34-cü turda Tovuzda “Sumqayıt”la qarşılaşacaq. Açığı, gəncəlilərin bu oyunların hansındasa qələbə qazanacağı inandırıcı görünmür. Fikrimcə, onlar qalan 4 turda maksimum 2 xal toplaya bilər ki, bu da mövsümü 30 xalla bitirmək deməkdi.

İndi isə “Səbail”in xal qazanmaq imkanlarını araşdıraq. “Dənizçilər” 33-cü turda “Şamaxı”nın, 35-ci turda “Neftçi”nin qonağı olacaq, 34-cü turda “Zirə”ni, 36-cı turda “Sumqayıt”ı məğlub edəcək. Bu 4 oyunda “Səbail”in 4 və ya 5 xal toplayacağını düşünürük. Yəni bu komanda mövsümü 25 və ya 26 xalla bitirəcək. Deməli, yenə də elitada yerini qoruya bilməyəcək. Qalan 4 turun təqvimi rəqiblə müqayisədə daha münasib olsa da, “Səbail”in artıq 1-ci liqa ilə bağlı planlar qurması ən yaxşı variantdı.

MÜZƏFFƏR QULUZADƏ