32-ci tur çempionu bəlli etmişdisə, 33-cü turda da 2-ci yerin sahibinə aydınlıq gəldi.

Fenomenal sabitlik göstərən “Zirə” ardıcıl ikinci mövsümü “Qarabağ”dan sonrakı pillədə bitirəcək. “Qartallar”ın Avropa, yoxsa Konfrans Liqasında mübarizə aparacağı isə kubokun finalının nəticəsindən asılıdı.

İlk iki yerin sahibi bəlli olsa da, açıq qalan suallar yenə də var. Söhbət ilk növbədə hansı komandanın 3-cü yeri tutacağından və elitanı kimin tərk edəcəyindən gedir. Axı 3-cü yer də avtomatik avrokuboklara vəsiqə deməkdi. “Turan Tovuz” indi hər nə qədər arxayın görünsə də, 4-cü yerin belə lüksü yoxdu.

“Turan Tovuz” cümə günü səfərdə “Zirə”yə uduzmaqla faktiki 3-cü yerdən əlini üzdü. Halbuki qələbə tovuzlular üçün bu mənada yaxşı perspektiv açacaqdı. “Qartallar” mövsümün ən sabit komandalarından biri kimi 2-ci yeri haqq etdi. Kurban Berdıyevin etirafı isə tovuzlu azarkeşləri diksindirdi. Əlbəttə, onun “belə oyunla avrokuboklara yollanmaq çətindi, avrokuboklara yollanmaqdan ötrü kubokun finalında "Qarabağ"a azarkeşlik etməkdən başqa çarə yoxdu” sözlərini nəzərdə tuturuq. Lap tutaq ki, komanda Konfrans Liqasına vəsiqə qazandı. Belə oyun, doğrudan da, biabırçılqı vəd edir.

“Şamaxı” – “Səbail” matçında qələbə hər iki komanda, xüsusən də qonaqlar üçün vacib idi. Amma oyunun böyük bölümündə ehtiyatlı oynayan tərəflər sonra meydanı hərəyə 1 xalla tərk etdi. Bu hesab “Səbail”in elitada qalmaq ümidlərini bir qədər də azaltdı. Açıq-aşkar hiss olunurdu ki, komandalar bir-birinin səhvini gözləyir. Təsadüfi deyil ki, qollar da məhz belə epizodlarda gəldi.

“Araz-Naxçıvan” növbəti dəfə qələbə hesabını qoruya bilmədi. Bu artıq adət halını alıb. Naxçıvanlılar hesabı açandan sonra dayanır, yuxuya gedir və rəqib də istər-istəməz bundan yararlanır. “Sabah”ı isə anlamaq olar. “Bayquşlar” artıq çempionat yolu ilə avrokuboklara vəsiqə şansını itirib. Vasili Berezutskinin üzərinə düşən əsas vəzifə yetirmələrini kubokun finalına qədər formada saxlamaq, həmin oyunda bütün gücünü ortaya qoymaqdı.

Çempionluq rəsmiləşsə də, “Qarabağ” üçün iş hələ bitməyib. Ağdamlılar “Sumqayıt” üzərində inamlı qələbə qazandı, yenə də oyunun axarını idarə etdi. “Kimyaçılar” çempionun təcrübəsi və sistemli oyunu qarşısında aciz qaldı. Qurban Qurbanovun komandası rəqibə ciddi imkan vermədən öz oyununu oynadı və üç xalı əldən vermədi.

“Neftçi” – “Kəpəz” matçında emosiyalar, kəskin dönüş və sonda heç-heçə yaşandı. “Neftçi” heç cür toparlana bilmir. Sanki bu baş məşqçi, komanda və futbolçular nəyin uğrunda oynadığını tam dərk etmir. “Kəpəz” isə növbəti dəfə qəhrəmanlığa qadir olduğunu göstərdi. “Sarı-göylər” gerçəkdən elitada qalmağa layiqdi!

2 may
Zirə - Turan Tovuz 1:0
3 may
Şamaxı – Səbail 1:1
Araz-Naxçıvan – Sabah 1:1
4 may
Qarabağ – Sumqayıt 2:0
Neftçi – Kəpəz 2:2

1. Qarabağ 33 25 5 3 80-19 80
2. Zirə 33 21 4 8 56-26 67
3. Araz-Naxçıvan 33 14 13 6 33-26 55
4. Turan Tovuz 33 12 13 8 39-37 49
5. Sabah 33 8 17 8 45-44 41
6. Neftçi 33 8 13 12 34-47 37
7. Şamaxı 33 9 9 15 31-41 36
8. Sumqayıt 33 8 6 19 27-50 30
9. Kəpəz 33 7 8 18 27-58 29
10. Səbail 33 4 10 19 27-51 22

Bombardirlər: Leandro Andrade (Qarabağ) – 14, Salifu Suma (Zirə) – 12, Cesse Sekidika (Sabah), Davit Volkov (Zirə) – 10.

Növbəti turun oyunları mayın 9-11-i aralığında keçiriləcək: “Sabah” – “Şamaxı”, “Səbail” – “Zirə”, “Turan Tovuz” – “Neftçi”, “Kəpəz” – “Sumqayıt”, “Qarabağ” – “Araz-Naxçıvan”.

ƏSƏD SEYİDOV