"Qış fasiləsi ərəfəsində demişdim ki, fasilədən sonra klublar arasında yerdəyişmələr olacaq. Fasiləyə qədər "Araz-Naxçıvan"la "Səbail" ilk “üçlük”də yer alırdı. "Sabah" 8-ci yerdə qərarlaşanda demişdim ki, bu komandanı siyahıdan silmək olmaz, potensialı var və dönüş edəcək. Komandada hansı proseslərin getdiyini biz bilmirdik. Hadisələrin axarı onu göstərdi ki, komanda uğurlu çıxışı qışdan sonraya saxlayıbmış. Dəyişiklikdən sonra klubda böyük bir sıçrayış baş verdi. Ardıcıl qələbələr qazanıldı. Demək olar ki, “Sabah” artıq mükafatçılar sırasındadı. 2-3-cü yerlər uğrunda mübarizə 4 komanda - "Sumqayıt", "Neftçi", "Zirə" və "Sabah" arasında davam edəcək. Artıq birinci yer əlçatmazdı. Əminliklə deyə bilərəm ki, "Qarabağ" tezliklə çempionluğu təmin edəcək, heç bir klub ona çata bilməyəcək. Sonuncu yerdə qərarlaşan "Qəbələ"nin geri dönüşü qeyri-mümkündü. Sonuncu olmamaq uğrunda mübarizənin "Kəpəz" ilə "Qəbələ" arasında gedəcəyini demişdim. Maşallah, Adil Şükürov komandanı qısa müddətdə toparlaya bildi, "Kəpəz"i dirçəltdi. "Araz-Naxçıvan"ın hazırkı durumu elə də yaxşı deyil. Ola bilər ki, "Kəpəz"lə "Araz-Naxçıvan" arasında yer dəyişikliyi olsun. Artıq sonuncu və 1-ci yerin sahibi bəllidi. Hazırda 2-3-cü yerlər və kubok uğrunda mübarizə gedir. Bu mübarizəyə "Sabah" da qoşuldu. Komandaya yeni baş məşqçi gətiriblərsə, yenilik gözləyək. Bəzi hallarda baş məşqçi dəyişikliyi uğur gətirmir. Bunu hazırda "Neftçi"nin timsalında görə bilirik. Artıq ikinci əcnəbi məşqçi dəvət olunsa da, komanda hələ ki öz oyununu tapa bilməyib. Motivasiya deyilən şey yoxdu. Bu baxımdan “ağ-qaralar” uğurlu nəticələr əldə edə bilmir və geri qalır. Məncə, "Sabah"ın mübarizəyə qoşulması "Zirə", "Neftçi" və "Sumqayıt" üçün problem yaradacaq. Komanda autsayderlər sırasında qərarlaşdığına görə çox diqqətə alınmırdı. Yeni baş məşqçiyə də 2-ci yeri tutmaq tapşırılıb. Mübarizə hələ indi qızışır. Son turlar daha maraqlı keçəcək. Bir məqamı da vurğulayım ki, 2-ci yer ilə 8-ci yerin arasında 8 xal fərqi var. O qədər böyük fərq deyil”.