"Qarabağ"la Yassin Benzya arasında problem ortaya çıxıb.

Xatırlayırsızsa, Ağdam təmsilçisinin futbolçuyla müddəti cari mövsümün sonunda başa çatacaq müqaviləni yeniləməkdə maraqlı olduğunu yazmışdıq. Yaxın günlərdə bunu həm baş məşqçi Qurban Qurbanov, həm də əlcəzairli oyunçu etiraf etdi.

İş ondadı ki, yarımmüdafiəçi maaşının artırılmasıyla bağlı tələbindən vaz keçmək istəmir. Komandanın aparıcı oyunçuları sırasında yer alan Benzya "Nuh deyir, Peyğəmbər demir".

Təbii ki, futbolçunun belə inadkarlığının səbəbi var. Səudiyyə Ərəbistanı klublarından, eləcə də başqa ölkələrin liqalarından "yağlı" təkliflər alan yarımmüdafiəçi "Qarabağ"da qalacağı təqdirdə böyük fürsətləri qaçırmaq istəmir.

Belədə "köhlən atlar" hansı addımı atacaq? Hələ bəlli deyil. Ağdam təmsilçisi heyətdə gözlənilən yeniliklərlə bağlı axtarışları intensivləşdirib, "qələmi qırılacaq" futbolçuların kimliyini götür-qoy edir.

İstənilən halda, bütün məsələlərə iyunun ilk günlərində aydınlıq gələcək.

KƏNAN BAHADIR