Yassin Benzya ilə danışıqları davam etdirən "Qarabağ" dalana dirənib.

Niyə? Çünki əlcəzairli futbolçu, loru dildə desək, şıltaqlıq edir və klubla ortaq məxrəcə gəlməkdən boyun qaçırır. Prosesi futbol dilində belə izah edə bilərik: Qurban Qurbanov yarımmüdafiəçini növbəti mövsüm də sərəncamında görmək istəyir. Lakin o, cari "futbol ili"nin sonunda müddəti başa çatacaq müqavilənin müddətinin uzadılmasına yalnız maaşının artırılacağı təqdirdə razıdı. Bu üzdən hələ "Qarabağ"la oyunçu arasında razılıq əldə olunmayıb.

Bəzi həmkarlarımızın iddiasına inansaq, Benzyanın illik qazancı 700 min avrodu. İş ondadı ki, xüsusilə, Səudiyyə Ərəbistanlı klubları ona daha böyük məbləğ vəd edir. Təbii ki, belədə Benzyanın ağzı sulanır, gözü ayağının altını görmür, necə deyərlər, rahatlıqla Ağdam təmsilçisinə qarşı tələblər irəli sürür - meydan oxuyur! Halbuki buna qətiyyən haqqı yoxdu...

Düzdü, Benzya "Qarabağ"ın indiyə qədər qazandığı uğurlarda böyük pay sahibi olub. Heç şübhəsiz, bundan sonra da komandadakı işinə davam etsə, qazanan təkcə futbolçu yox, həm də "köhlən atlar" olacaq. Amma bu məqamlar oyunçunun "əlini gücləndirmək" üçün yetərli deyil. Ona görə ki, Qurban Qurbanovun sərəncamında həm də Kadi Borges kimi məhsuldar "rəqibi" var. Bununla yanaşı, "Qarabağ"dan ayrılanların sonrakı taleyi hamıya bəllidi. Yunanıstan, Fransa və və Türkiyə kimi ölkələrin nəhəng komandalarında tapa bilmədiyinə Azərbaycan təmsilçisinə qovuşan, bunun sayəsində ölkəsinin milli komandasında da güvənilən və ümidləri doğrultmağı bacaran Benzyanın öncəliyi hələ pul yox, "Qarabağ"a olan vəfa borcunu ödəmək olmalıdı.

Uzağa getməyək. Braziliyaya qayıdan Juninyonun ölkəsində yaşadığı eniş göz qabağındadı. Elə uzun müddət "Bayer-04"ün ehtiyat oyunçular skamyasını isidən Andrey Lunyovun "Qarabağ"la "dirilib", sonradan ortaya atdığı maddi tələblər və bunun nə ilə nəticələndiyi də.

Belə-belə işlər, Benzya... "Köhlən atlar" nə nazla oynamağı xoşlayır, nə də əsəbiylə oynayanları... Burda sənin üçün ən uyğun seçim topdu.

KƏNAN BAHADIR