Avropa Liqasının əsas mərhələsini sonuncu pillədə başa vuran “Qarabağ” azarkeşlərini üzməklə yanaşı, futbol ictimaiyyətini də təəəccübləndirdi.

Uğursuzluğun günahını baş məşqçi Qurban Qurbanovda görənlər də oldu, artıq əvvəlki performansını sərgiləməkdə çətinlik çəkən futbolçularda da. Reallıq odu ki, tərəfdarlar artıq premyer-liqada və ölkə kubokunda əldə olunan uğurlu nəticələri inkişaf göstəricisi kimi qəbul etmir və Ağdam təmsilçisindən avrokuboklarda daha böyük uğurlar gözləyir.

Son günlərdə mətbuatda yayılan məlumatlarda “köhlən atlar”ın yay “transfer pəncərəsi” çərçivəsində heyətdə köklü dəyişikliklər edəcəyi qeyd olunur. Bəzi həmkarlarımızın iddiasına inansaq, qarşıdakı aylarda kollektivdən azı 5 futbolçu ayrılacaqsa, bunun qədər də yeni oyunçu alınacaq. Xatırladaq ki, “Qarabağ”ın baş meneceri Asif Əsgərov “Football-plus.az”a açıqlamasında bu bilgiləri nə təkzib, nə də təsdiq edib.

Bəs, yayda komandanı tərk etmək ehtimalı olan futbolçular hansılardı?

Bu suala aydınlıq gətirmək üçün 2024/25 mövsümün sonunda klubla müqaviləsinin müddəti başa çatacaq futbolçuların siyahısını tərtib etdik:

Şahruddin Məhəmmədəliyev, Kevin Medina, Bədavi Hüseynov, Mateus Silva, Abbas Hüseynov, Marko Veşoviç, Patrik Andrade, Yassin Benzya.

Vurğulayaq ki, Benzya artıq “Qarabağ”ın onunla danışıqlara start verdiyini etiraf edib.

KƏNAN BAHADIR