2022-ci ildən ''Qalatasaray''ın şərəfini qoruyan və fanatların sevimli oyunçularından olan Dris Mertens ilə bağlı maraqlı xəbər var.

Katrin Kerkhoff adlı xanımla evli olan və Çiro adlı bir oğlu olan belçikalı ulduz ikinci dəfə ata olmağa hazırlaşır. Cütlüyün bu yaxınlarda bir qızı dünyaya göz açacaq. Ailəsi ilə birlikdə İstanbulu çox sevən, hər fürsətdəcə şəhəri gəzməyə çıxan, müxtəlif yerlərdən şəkillər paylaşan Mertens yeni doğulacaq körpəyə türk adı vermək niyyətindədi.

Türkiyə mətbuatının yazdığına inansaq, 38 yaşlı futbolçu qızına iki ad qoyacaq və bunlardan biri türk adı olacaq. İstanbula olan sevgiləri üzündən bu cür qərar qəbul edən cütlük adın ingilis xarakterinə uyğun olmasına da diqqət yetirəcək. Öz dillərində asan tələffüz edilən adlar axtaran ikilinin Selin və ya Nil kimi adlara üstünlük verəcəyi gözlənilir.

Qeyd edək ki, karyerasında ilk ölkə çempionluğunu məhz Türkiyədə qazanan Mertensin müqavilə müddəti mövsümü sonunda başa çatacaq. Onun müqaviləni yeniləyəcəyi gözlənilmir. Futboldan doyduğunu bildirən ulduz futbolçu karyerasını başa vurmağı planlaşdırır. Onun məşqçiliyə də marağı yoxdu. Mertens artıq tamamilə zamanını ailəsinə ayırmaq və onlarla birlikdə dünyanın fərqli nöqtələrini gəzmək istəyir.

Mertensin indiyə qədər ''sarı-qırmızılar''ın heyətində meydana çıxdığı 132 oyunda aktivinə 24 qol, 44 məhsuldar ötürmə yazdığını bildirək.