Türkiyə futbolunun tanınmış mütəxəssislərindən olan Bülənt Uyğunun ailəsindən üzücü xəbər gəlib.

Belə ki, təcrübəli məşqçinin qızı Almina Tude uzun müddətdi əziyyət çəkdiyi xəstəlik üzündən dünyasını dəyişib. Türkiyə mətbuatının yazdığına inansaq, 28 yaşlı xanım şəkərli diabet xəstəliyindən əziyyət çəkirdi. Ötən il onun bu xəstəliyə qalib gəlməsi barədə ümidverici xəbərlər peyda olmuşdu. Amma sonradan bunun həqiqətəuyğun olmadığı üzə çıxmışdı. Sentyabrdan etibarən vəziyyəti pisləşməyə başlayan Almina son günlər reanimasiyaya yerləşdirilmişdi.

Qeyd edək ki, Almina Bülənt Uyğunun ilk ailəsindən olan qızıdı. O, ilk həyat yoldaşı Qamze Uyğun ilə 2012-ci ildə boşanmışdı. Məşqçinin 2014-cü ildə ikinci dəfə ailə qurduğu Özləm Füsun Önal adlı xanımdan isə bir oğlu var. 53 yaşlı Bülənt Uyğun həm futbolçu, həm də məşqçi kimi Türkiyə futbolunda iz buraxmağı bacarıb. “Fənərbaxça” ilə həm ölkə çempionluğunu (1995/96) qazanan, həm də Türkiyə çempionatının bombardiri (1993/94) olan Uyğun məşqçi kimi 10-dan artıq klubu çalışdırıb.

Məşqçi kimi titulu olmasa da, 2007/08 və 2008/09 mövsümlərində ortabab “Sivasspor” məhz onun başçılığı altında çempionluq uğrunda mübarizə aparmaqla diqqət çəkmiş, hətta ÇL-in təsnifatına vəsiqə də qazanmışdı.