''Qalatasaray''ın bu yay böyük ümidlərlə heyətinə qatdığı Dris Mertens hələ ki, komandaya fayda verməyib.

Football-plus.az xəbər verir ki, 35 yaşlı belçikalı ulduz superliqanın ilk 7 turunda nə qol vurub, nə də məhsuldar ötürmə ilə fərqlənib. Bununla da Mertens karyerasında 16 ildən sonra acı bir ilki yaşayıb. Belə ki, onun mövsümün ilk 7 çempionat oyununda qolun vurulmasında iştirak etməməsinə sonuncu dəfə 2006/07-də rast gəlinmişdi. Mertens həmin vaxt ''Utrext''də çıxış edirdi və karyerasının ilk peşəkar mövsümünü keçirirdi.

Ötən mövsüm Mertens ''Napoli''də zədə üzündən ilk 6 turu buraxmış və 7-ci turdan etibarən meydana çıxmışdı. 13-cü turda ''İnter'' ilə qarşılaşmada ilk qolunu vurmuşdu. 2020/21-in ilk 7 turunda isə o, 2 qol, 3 məhsuldar ötürmə ilə yadda qalmışdı. Belçikalının Türkiyədə özünü göstərə bilməməsinin səbəblərindən biri onun hücumun mərkəzində yox, hücumdan bir qədər arxada oynadılmasıdı. Mertens Türkiyəyə gələnə qədər karyerasında 190 oyunda mərkəz hücumçusu kimi oynamış və 93 qol vurmuşdu. Hücumçuların arxasında oynadığı 54 qarşılaşmada isə 18 dəfə fərqlənmişdi.