Amerikanın “Kadillak” komandası həftəsonu keçiriləcək Mayami mərhələsi ərəfəsində təqdimat mərasimi keçirəcək.

Xatırladaq ki, bu komanda 2026-cı ildən dünya çempionatının iştirakçıları sırasına qoşulacaq. 2029-da zavod komandası statusu alacaq “Kadillak” həmin vaxta qədər “Ferrari” mühərriklərindən istifadə edəcək. Mayın 3-də Mayamidə keçiriləcək təqdimat mərasimində “Kadillak”ın və “Ceneral Motors”un rəhbərləri, eləcə də Hollivud aktyorları və “İndikar”ın ulduzları iştirak edəcək.

Hələ ki “Kadillak” növbəti mövsüm üçün pilotlarının adını açıqlamayıb. Amma meksikalı Serxio Peresin də Mayamiyə təşrif buyurması müəyyən mülahizələr irəli sürməyə əsas verir. Amerika komandası hazırda onunla danışıq aparır, müqavilə imzalamağa çalışır. Peres 2011-24 aralığında “Formula-1”də yarışıb. “Red Bull”dan başqa “Zauber”, “Maklaren”, “Fors İndiya” və “Reysinq Poynt” komandalarının şərəfini qoruyub, 2023 mövsümündə şəxsi hesabda 2-ci yei tutub. 2024 mövsümündə o, şəxsi hesabda 8-ci, komanda yoldaşı Maks Ferstappen isə çempion olub.
Ferstappendən söz düşmüşkən, “Alfa Tauri”nin sabiq rəhbəri Frants Tost onun haqda danışıb:

Bu arada "Formula-1" Meksika “Qran-pri”si ilə müqavilə müddətini 2028-ci ilə qədər uzadıb. Bu xəbəri baş direktor Stefano Domenikali açıqlayıb. Xatırladaq ki, Meksika mərhələsi 2015-ci ildə təqvimə qayıdıb. Bundan əvvəl 1992-ci ilə qədər hazırkı trassda yarışlar keçirilirdi. Əvvəlki müqavilənin müddəti 2025-ci ilin sonuna qədər idi. Meksika “Qran-pri”si bu il oktyabrın 24-dən 26-na qədər keçiriləcək. Bakıdakı mərhələ isə sentyabrın 19-21-i aralığında təşkil olunacaq.