Şimali Makedoniya Futbol Federasiyası ötən həftəsonu baş tutan qalmaqallı ''Qostivar'' - ''Rabotniçki'' oyunu ilə bağlı yekun qərarını açıqlayıb.

Bu oyun avrokuboklara vəsiqə baxımından böyük önəm kəsb edirdi. ''Qostivar'' qalib gələcəyi təqdirdə 3-cü pillədəki ''Rabotniçki'' ilə xal fərqini 1-ə endirəcəkdi.

1998-ci ildə yaradılan və eyni adlı şəhəri təmsil edən ''Qostivar''da türkiyəli isimlər var. Klubun prezidenti türkiyəli iş adamı Enes Ustadı. ''Fənərbaxça'', ''Ankaragücü'', ''Çaykur Rizəspor''un sabiq futbolçusu Alpər Potuk da karyerasını burda davam etdirir.

''Rabotniçki'' ilə oyuna gəlincə, bütün əsas hadisələr ikinci hissədə yaşandı. Doğma fanatları önündə oynayan ''Qostivar'' 67-ci dəqiqədə hesabı açdıqdan bir müddət sonra azlıqda qaldı. ''Rabotniçki'' 79 və 84-cü dəqiqələrdə vurduğu qollarla 2:1 önə keçdi. ''Qostivar'' 2-ci qolu buraxdıqdan sonra hakim qərarlarına etiraz əlaməti olaraq oyunu davam etdirmək istəmədi. Maraqlıdı ki, komandanın meydandan çəkilməsində ən çox canfəşanlıq edən məhz türkiyəli futbolçu oldu. Alpərin göstərişi ilə komanda yoldaşları oyuna mərkəzdən baslamayaraq paltardəyişmə otağına yollandılar.

Federasiya bu olayla bağlı çox sərt cəzalar açıqlayıb. Öncə ''Qostivar''a 0:3 hesablı texniki məğlubiyyət verildiyini, 9 xalının silindiyini və komandaya 7500 avro pul cəzası verildiyini bildirək.

Bundan başqa bu kollektiv növbəti 10 ev oyununu azarkeşsiz keçirməli olacaq. Amma əsas cəza türkiyəli isimlərlə bağlıdı. Həm Alpər Potuk, həm də klub prezidenti Enes Usta 2 illiyə futboldan kənarlaşdırılıb! ''Qostivar''ın bu ağır cəzalara etiraz edəcəyi gözlənilir.