Bir qədər stajlı türkiyəli futbolsevərlərə gözəl tanış olan, ''Fənərbaxça'' və ''Beşiktaş''da forma geymiş, hazırda isə baş məşqçi kimi çalışan Mərt Nobredən xəbər var.

Qeyd edək ki, məşqçiliyə ''Akhisarspor'' və ''Hatayspor''da köməkçi işləməklə başlayan Nobre daha sonra Gənclərbirliyi və son olaraq ''Çorum''u çalışdırmışdı. 43 yaşlı mütəxəssis Şimali Makedoniya təmsilçisi ''Qostivar''ın başına keçib. Klubdan verilən rəsmi açıqlamada Nobre ilə birillik müqavilə imzalandığı qeyd olunub.

Bu klubun idman direktoru da Türkiyə futbolunda kifayət qədər tanınan isimdi. Söhbət ''Fənərbaxça''nın sabiq forvardı Mussa Soudan gedir. Eyniadlı şəhəri təmsil edən ''Qostivar'' 12 komandalı Şimali Makedoniya çempionatında 10 tura topladığı 17 xalla 4-cü pillədə qərarlaşıb. Bu kollektiv mövsümdə ilk məğlubiyyətini ötən həftəsonu ''Rabotniçki'' ilə səfər oyununda (0:1) yaşadı.

Yeri gəlmişkən, daha öncə ''Fənərbaxça''da forma geymiş Ərtən Ərsu, Nabil Dirar və Alpər Potuk kimi isimlər də hazırda ''Qostivar''da çıxış edir.

ƏLİ