Türkiyədə qadınlar arasında futbol üzrə ölkə çempionatında mövsümün bitməsinə bir tur qalmış aləm bir-birinə dəyib. Çempionluq uğrunda ''Fənərbaxça'' ilə ''Ankara Böyükşəhər Bələdiyyəsi FOMGET'' arasında çox gərgin bir rəqabət yaşanır.

''Fənər'' son turda ''Bəylərbəyi''ni 1:0 məğlub etdi. ''FOMGET'' isə ''Bornova Hitab''ı səfərdə 12:1 darmadağın etdi. Bu turnirdə xallar bərabər olduqda çempionluğun taleyini top fərqi həll edir. Hazırda zirvədə qərarlaşan iki klub eyni xala malikdi.

''FOMGET'' son turdakı qələbə ilə vəziyyətini bir xeyli yaxşılaşdırdı. İndi bu komanda top fərqində ''Fənər''dən +5 öndədi. Ancaq ''sarı-lacivərdlilər''in fikrincə, ankaralıların son qələbələri təmiz deyil! Çünki bundan əvvəlki turda da ''FOMGET'' ''Çəkməköy''ü 19:0 kimi qəribə bir hesabla darmadağın etmişdi. 12:1-dən sonra isə İstanbul nəhənginin səbr kasası daşdı. ''Fənər'' hər iki qarşılaşmanın Etika Komitəsi tərəfindən araşdırılması üçün Türkiyə Futbol Federasiyasına rəsmi müraciət etdi. Komitə müraciəti qəbul edərək vaxt itirmədən oyunların araşdırılmasına başlayıb. Qısa müddətdə federasiya tərəfindən araşdırmanın nəticələri ilə bağlı rəsmi məlumat veriləcəyi gözlənilir.

Turnirdə mayın 4-də keçiriləcək son turun böyük həyəcana səhnə olacağı gözlənilir. Son turda ''Fənərbaxça'' 7-ci pillədə qərarlaşan Qaziantep təmsilçisi ALG-nin qonağı olacaqsa, ''FOMGET'' 4-cü pillədə qərarlaşan ''Qalatasaray''ı qəbul edəcək.