“Zirə” “Şerif”lə ev oyununda acınacaqlı şəkildə uduzmaqla hər kəsi xəyal qırıqlığına uğratdı. Və haqlı olaraq, tənqid atəşinə tutuldu. Bu tənqidi ən çox haqq edənlərdən biri də Salifu Sumadı.

2003-cü il oktyabrın 3-də dünyaya gələn Suma ötən ilin avqustundan “Zirə”dədi. Fransanın 1-ci liqa klubu “Havr”dən gətirilən gənc oyunçunun 2025-ci ilə qədər müqaviləsi var. Qvineyalı yarımmüdafiəçi “qartallar”ın heyətində son mövsümdə 41 oyuna çıxıb, 6 qol vurub. Təəssüf ki, Avropa Liqasında uğurlu ola bilmədi. “Zirə”nin məhz onun hərəkəti üzündən bu turnirdən Konfrans Liqasına “köç etdiyini” də deyə bilərik. Oyundan sonra sosial şəbəkərdə qvineyalının klubdan qovulmasını tələb edənlər də var idi. Rəşad Sadıqov isə “epizoda baxacam, səhvi varsa, böyük cəza alacaq” deməklə bütün ehtimalların mümkünılüyünə işarə etdi.

Yaxşı, Suma göndərilməlidimi?

Yadımıza bir neçə ay öncə elə Avropa Liqasının 1/16 final mərhələsinin “Braqa” ilə görüşündə “qırmızı” alan Elvin Cəfərquliyevi salaq. Qurban Qurbanov ona 1/8 finalda - “Bayer-04” ilə oyunda da şans verdi, amma yenə qırmızı vərəqə aldır. Komandası mərhələ keçə bilmədiyinə görə Elvin qovuldumu? Təbii ki, xeyr. Qurbanov ona etimadını itirmədi, əksinə, şans tanıdı. Rəşad Sadıqov da hocadan çox şey görüb-götürüb. Onun yolu ilə getməsi də yalan deyil. Əlqərəz, Sadıqov 20 yaşlı futbolçuya belə səhvə görə, yəqin ki, ağır cəza verməz.

RÖYANƏ OĞUZ