İkinci liqada mayın 4-də keçiriləcək “Şəfa” – “Şahdağ Qusar” oyunu indidən diqqət mərkəzindədi.

Həm də təkcə çempionun adını müəyyənləşdirəcəyinə görə yox. İş ondadı ki, paytaxt klubunun rəhbərliyi dünən satışa çıxardığı biletləri almağı arzulayan qusarlı azarkeşlər üçün şok qiymət müəyyənləşdirib – 10 manat!

“Şəfa”nın rəhbəri Sərdar Salmanzadə birinci dövrədəki oyun ərəfəsində Qusar klununun da eyni cür davrandığını deyib. “Football-plus.az”a açıqlama verən şimal təmsilçisinin prezidenti Elçin Cananov isə həmkarı ilə razılaşmayıb, Şamaxı Olimpiya İdman Kompleksində keçirilən oyunda biletin qiymətinin 2 manat olduğunu deyib.

Xatırladaq ki, dekabrın 9-da keçirilən oyunda nominal ev sahibləri – “Şahdağ Qusar” 7:1 hesabıyla qalib gəlmişdi. Stadionda isə cəmi 400 azarkeş var idi. Bunların da 200-ü “Şəfa” azarkeşi olub. Bu da o deməkdi ki, Elnur Abdullayevin komandasını cəmi 200 azarkeş dəstəkləyirdi. Elçin Cananov saytımıza açıqlamasında Bakıda qalan tələbələrin, qusarlıların çox olduğunu, oyuna baxmaq istədiklərini vurğulayıb. Çox güman, “ASK Arena”da qələbəlik olacaq. İlk dövrədəki oyunun 1:7 bitməsi “Şəfa”nı qorxudur. Qusarlı azarkeşlər Bakıda da tribunaları ələ keçirsə… Yəqin ki, hər şey aydındı.

Sonda bir daha xatırladaq ki, “Şəfa” – “Şahdağ Qusar” oyunu, mayın 4-ü, saat 16.00-da başlayacaq.

MÜZƏFFƏR QULUZADƏ