Ötən gün İran futbol tarixinin ən dramatik oyunlarından biri keçirildi.

Mükafatçılar sırasına düşməyə can atan “Fulad”la 55 ildən sonra çempionluğa bu qədər yaxın olan “Traktor” Əhvazda qarşılaşdı. Təbrizlilərin 2:1 hesablı qələbəsi ilə bitən oyunun final fiti çalınandan ekranda 118-ci dəqiqənin 13-cü saniyəsi gedirdi. Beləliklə, 90 dəqiqə bitəndən sonra futbolçular meydanda nə az, nə çox - 27 dəqiqə qaldı.

Matç bitəndən dərhal sonra “Traktor”un qələbə topunu 90+23-cü dəqiqədə vurduğunu xəbər vermişdik. Bəs meydanda nə baş verib ki, oyun az qala yarım saat sonra yekunlaşıb? 50-ci dəqiqədə “Traktor”un futbolçusu rəqib cərimə meydançasında yerdə qalır. VAR isə penalti qərarı verib-verməmək məsuliyyətini baş hakim Moud Bonyadifarın üzərinə atır. Tərslikdən mərkəzi otaqdan meydanın kənarına – VAR monitoruna görüntünün ötürülməsində problem yaranır, hakim epizoda baxa bilmir ki, bilmir. Düz 16 dəqiqə sonra oyun bərpa olunur.

Amma konkret dünənki oyunda “Traktor”a qərəz var idimi? – bu bir qədər ziddiyyətli mövzudu. “Traktor”un qapısına penalti elə VAR qərarı ilə verildi. Amma igidi öldür, haqqını yemə. Rəqibə qırmızı vərəqə də məhz VAR-ın müdaxiləsindən sonra verildi. Qərəz olduğunu demək olmaz, amma “Traktor”un baş məşqçisi Skoçiç demişkən, nə işdisə, bütün VAR problemləri “Traktor”un oyununda yaranır.

Əsas odu ki, “Traktor” qələbə qazandı, Təbriz qələbə qazandı, Güney Azərbaycan qələbə qazandı. Biz hamımız birlikdə çempionluğa doğru böyük addım atdıq.

MÜZƏFFƏR QULUZADƏ