İranın futbol çempionatında 26-cı tur arxada qalıb. “Traktor” sonuncu turda səfərdə “Çadormalu” ilə heç-heçə edib - 2:2.

“Football-plus.az”ın qonşu ölkənin çempionatına xüsusi maraq göstərməsinin səbəbi var. Axı Güney Azərbaycan türklərinin qüruru tarixində ilk dəfə İran çempionu olmağa çox yaxındı.

İş ondadı ki, “Traktor” bu il də çempion olmasa, günahı yalnız özündə görməlidi. Duruma baxaq: 26-cı turdan sonra “Traktor”un 55, “Sepahan”ın 53, “Persepolis”in 51 xalı var. Təbriz klubu əsas rəqibləri ilə müqayisədə bir oyun az keçirib. Həmin oyunda mümkün qələbəni də nəzərə alsaq, “Sebahan”la xal fərqi 5-ə çatır.

İndi isə qalan turların proqramına baxaq. “Traktor” 27-ci turda hazırda 6-cı pillədə qərarlaşan “Malavan”ı qəbul edəcək. Liderin əsas izləyiciləri - “Sepahan” və “Persepolis” bir-biri ilə qarşılaşacaq. Bu oyunun heç-heçə bitməsi əla olardı. Lap bu komandalardan hansısa qələbə qazansa belə, yenə bütün kartlar “Traktor”un əlindədi.

Son üç turun təqvimi də “Traktor”a, sadəcə, “gəl, çempionluğu götür” deyir. Təbriz klubu 28-ci turda 11-ci pillədəki “Şəms Azər Qəzvin”in, 30-cu turda 10-cu pillədəki Xuzestan “Esteqlal”ının qonağı olacaq. Bu iki səfər oyunu arasında isə aşkar autsayder “Nassaji” ilə qarşılaşma var. 22-ci turdan təxirə salınan oyuna gəlincə, “Traktor” aprelin 24-də “Fulad”ın qonağı olacaq.

Bir sözlə, hər şey Təbrizin çempionluğuna doğru aparır. 55 illik həsrət bitməlidi, ya da bitməlidi!

MÜZƏFFƏR QULUZADƏ