“Bu komandalar arasında oyunlar artıq, sadəcə, ad olaraq derbidi. Yoxsa son dörd ildə “Neftçi”nin “Qarabağ” üzərində qələbəsi yoxdu. Bu mövsümdə “Qarabağ”a bir qol belə vura bilmədilər. Son oyuna baxanda da gördük ki, “Neftçi” bütün komponentlərdə uduzdu. İlk hissədə “Qarabağ” rəqibə hücum etmək imkanı verdi. Sonra da bu hücumlar zamanı müdafiədə boşluqlar verən “Neftçi”ni cəzalandırdı. İlk hissədə vurulan üç qol bunun nümunəsidi. Düşünək ki, “Neftçi” üçün çempionatda medallar uğrunda mübarizə bitib, amma kubok oyunları davam edir. “Neftçi” üçün vacib olan zədəlilərin minimum olması, “Sabah”la oyuna maksimal heyətlə çıxmaq vacib idi. “Neftçi”nin zədəliləri olduğu bəllidi. Kubok oyunundan əvvəl də zədələnəcək futbolçu onların işini daha da ağırlaşdıracaqdı”.

“Hər kəs derbi ab-havası yaratsa da, bu oyuna artıq derbi demək olmaz. Səbəblərdən biri “Neftçi”nin çempionatda tutduğu mövqedi. Bu mövsüm üçün onlardan böyük gözləntilər yoxdu. Tək gözlənti kubokdu. Bunu həm oyunda gördük, həm də Samir Abasovun mətbuat konfransında dediklərindən başa düşdük. Oyundan öncə məlum idi ki, bu oyun onlar üçün ölüm-dirim mübarizəsi olmayacaq. Məsələyə iki tərəfdən baxmaq lazımdı. “Neftçi”, ümumiyyətlə, qol vəziyyəti yarada bilməsəydi, məşqçini günahlandırmaq olardı. İki-üç çox yaxşı qol həmlələri oldu. Əks-hücumda “Qarabağ”ı yaxalaya bildilər. Oyunçu keyfiyyəti, oyuna köklənmək imkan vermədi ki, qol vura bilsinlər. Ramil Şeydayevin epizodunda onun indiki durumu qola mane oldu. Bundan əvvəlki oyunda “Neftçi” çox yaxşı təsir bağışlamışdı. Fərdi səhv gətirib qola çıxardı. Deyə bilmərəm ki, “Neftçi”nin futbolçuları səviyyəsizdi. “Zirə”ilə müqayisə edəndə fərdi olaraq yaxşı keyfiyyətə malik futbolçular var. Bunlar baş məşqçinin oyun üslubuna uyğun gəlirmi? Əsas sual budu. Samir Abasov futbolçularına topu hara gəldi vurmağı tapşırmır. Mən onu tanıyıram, “Sumqayıt”da da dəfələrlə görmüşük. Müdafiəçilərin ötürmələrlə mərkəzə gəlməsini, komandanın irəli çıxmasını istəyir. Bunun üçün mərkəz müdafiəçiləri maksimum az səhv etməlidilər. “Neftçi”də belə stopper görmürəm. Düzdü, ötürmə verirlər. Amma bu həmişə yaxşı olmur. Komandanın buraxdığı qolların faizi geridən verilən paslarda yol verilən fərdi səhvlərin nəticəsidi. Müdafiə olunanda da aqressivlik göstərsələr də, surət baxımdan rəqiblərinə əməlli-başlı uduzurlar. Nəriman, Andrade iki metr arxada ola-ola, Höccəti rahatlıqla keçib qol vura bilir. Digər komandalarla oyunlarda da bu hallarım şahidi olmuşuq. Fikrimcə, Höccət kimi futbolçular “Neftçi” kimi klubda olmamalıdı. “Qarabağ”da oyunu həll edə biləcək cinah hücumçuları var - Andrade, Zubir. Qol vurmayanda belə komandaya çox xeyir verə bilirlər. “Sabah”ın vəziyyəti yaxşı olmasa da, cinah hücumçuları həddən artıq çox iş görür. “Zirə”nin qələbələrinin 60 faizi cinah hücumçularının hesabınadı. “Neftçi”də isə nə mərkəzdə, nə də cinahlarda effektivlik görürük. Buna görə də komandanın hazırda tutduğu yer elə də təəccüb doğurmur. Bəlkə də bu legionerlər başqa komandada, məsələn, “Sumqayıt”da olsaydı, ayrı səviyyə göstərə bilərdi. İnanmıram ki, Samir əvvəldən komandanı yığsaydı, bu futbolçuları götürərdi. “Neftçi”nin futbolçularından çoxunun müqaviləsinin müddəti mövsümün sonunda bitir. Bu da təsir edən faktdı ki, futbolçular canla-başla oynamır”.