Leroy Mikels: “Sabah”, “Neftçi”, yoxsa “Araz-Naxçıvan”? – rəsmi açıqlama
Qış “transfer pəncərəsi”ndə daxili bazarda gündəmdə olan futbolçulardan biri, bəlkə də birincisi “Şamaxı”nın şərəfini qoruyan Leroy Mikelsdi. Yerli mətbuatda onun gah “Araz-Naxçıvan”a, gah “Sabah”a, gah da “Neftçi”yə keçəcəyi ilə bağlı xəbərlər dolaşır.
Bəs bu iddialar nə dərəcədə doğrudu? Ümumiyyətlə, “şirlər” adı çəkilən klublardan rəsmi təklif alıbmı? Mikelsin keçidiylə bağlı hansısa danışıqlar varmı?
“Football-plus.az”ın sualını bölgə təmsilçisinin idman direktoru Kamran İsmayılov cavabladı:
“Leroy Mikels “Şamaxı”yla müqavilə müddəti davam edən futbolçudu. Heç bir klub onun transferiylə bağlı bizə rəsmi müraciət etməyib. Belə xəbərləri yalnız mətbuatda oxuyuruq. Rəsmi nəsə yoxdu - nə təklif var, nə də danışıq. Mikels hazırda düşərgəmizdədi və məşqlərdə iştirak edir”.
Xatırladaq ki, futbolçunun “şirlər”lə müqaviləsinin müddəti bu ilin iyununda başa çatacaq. O, cari mövsümdə meydana çıxdığı 16 premyer-liqa, 1 ölkə kuboku matçında 4 qol, 3 məhsuldar ötürmə ilə yadda qalıb.
KƏNAN BAHADIR
Digər xəbərlər
