“Təbii ki, Emin kimi kreativ və düşüncəli futbolçu bütün komandalara lazımdı. “Qarabağ”a, “Zirə”yə, xüsusilə də “Neftçi”yə. Qurban Qurbanovun kollektivində belə oyunçuların sayı çoxdu. Rəşad Sadıqov həmin mövqedə Georgi Papunaşvilidən yararlanır. İnsafən deyim ki, gürcü futbolçu ümidləri artıqlamasıyla doğruldur. “Neftçi”də isə bu yöndə ciddi çətinliklər var. Eminin olmadığı matçlarda orta sahə, demək olar ki, nəzarətsiz qalır. Komanda istədiyi nəticəni əldə etməkdə çətinlik çəkir, baxımlı oyun göstərə bilmir. Əlbəttə, Emin tez-tez zədələndiyi üçün fiziki formasını itirir. Lakin onun düşüncə tərzi, verdiyi qərarlar, meydanda futbolçulara yön verməsi və hakimiyyəti ələ alması kimi xüsusiyyətləri yerindədi. Bu baxımdan “Neftçi”nin növbəti mövsüm üçün hədəfi böyükdüsə, Emin kimi futbolçunun komandada qalması vacibdi. Ola bilər ki, baş məşqçi fərqli düşünür və ona dağıdıcı, mübariz futbolçu lazımdı. Yenə də Emin kimi xüsusi keyfiyyətlərə malik oyunçu hər kollektivə lazımdı. Millidə müvəqqəti baş məşqçi kimi çalışdığım dönəmdə Emin zədə üzündən formasını itirmiş halda düşərgəyə gəlmişdi. Ona müəyyən dəqiqələrdə şans verməklə potensialından maksimum faydalandım. Ümumiyyətlə, hələ də Eminin təcrübəsindən yararlanmaq olar”.